Galledii Sámedikki

Stáhtačálli Eli Blakstad galledii otne Sámediggeráđi Vibeke Larsena.  Čoahkkima fáddán lei plánejuvvon elfápmolinnjá gaskal Ofuohta, Báhccavuona ja Hámmarfeastta.

Norgga čázádat- ja energiijadirektoráhta (NČE) mearridii gieskat juolludit Statnett:ii doaibmalobi ceggegoahtit elfápmolinnjá. Dát mearrádus lea váidojuvvon, ja váidagat galget meannuduvvot Oljo- ja energiijadepartemeanttas.

Sámediggi deattuhii gulahallama mávssolašvuođa váiddagieđahallama vuolde, vai sámi ja boazodoalu beroštumit vuhtiiváldojuvvojit. Blakstad lei dasa positiivalaš.

-Mis lei positiivalaš ja konstruktiivalaš ságastallan iešguhtet beliid birra linnjá huksemis. Dáid mii váldit mielde viidáset barggus.  Mun mielastan joatkán gulahallama Sámedikkiin, cealká stáhtačálli Eli Blakstad.

Čoahkkimis sohppojuvvui rámma viidáset gulahallamii, ja Sámediggi  oažžu earret eará vejolašvuođa meannudit ášši dievasčoahkkimis čakčat. Sámediggi maid bovde stáhtaráđi Ola Borten Moe dievasčoahkkimii.

-Mun rámidan Sámedikki ovttasbargovuoiŋŋa. Elfápmolinnjá lea dehálaš buoridit elfápmosihkkarastima Davvi-Norgii, ja dán guovllu ealáhusovdánahttimii lea dát mávssolaš. Mii buohkat dás beroštat, ja dál šaddá dehálaš ovttas gávdnat buriid čovdosiid linnjá ceggemii, dadjá Eli Blakstad.

Elfápmolinnjá Ofuohta, Báhccavuona ja Hámmarfeastta gaskka  lea 513 km guhkkosaš, ja guoskkaha 14 gieldda. Plána mielde galgá dát linnjá gárvvis jagi 2018.