-Dárbbašlaš fápmojohtasat davvin

Oljo- ja energiijaministara Ola Borten Moe buvttii dearvuođaid Sámedikki dievasčoahkkimii mii otne lágiduvvui Kárášjogas.

-Rávnnji sihkkaris doaimmaheapmi Davvi-Norggas ferte buoriduvvot.  Dalle fertet mii hukset fápmojohtasiid Ofuohtas davásguvlui.  Dat attášii davimus riikkaoassái dohkálaš rávdnjesihkkarvuođa seammá dásis go muđui riikkas, ja dasa lea dárbu dustet lassáneaddji rávdnjegeavahusa dán guovllus.  Mun lean oadjebas das ahte mii oaččuhat áigái buriid huksenčovdosiid, ja mus lea dáhttu joatkit buorre ja vuđolaš gulahallama sámi beroštumiiguin ovdal go mearrádusat dahkkojuvvojit, celkkii oljo- ja energiijaministtar Ola Borten Moe go doalai sáhkavuoru Sámedikkis.

Son válddii maid ovdan bieggamillohuksemiid Davvi-Norggas.

-Bieggamillohuksemiid ektui dáppe davvin mii meroštallat ahte sullii 5-10 bieggamilloášši galget meannuduvvot ovdal jagi 2014. Lea maid čielggas ahte buohkat geat leat ohcan hukset bieggamilluid dáppe davvin eai  oaččo doaibmalobi. Jos prošeavttat váikkuhit boazodollui dahje eará sámi beroštumiide, de dáidda deasttaide biddjojuvvo stuorra deaddu, dajai Borten Moe.

Stáhtaráđis lea maŋŋelis otne čoahkkin Sámediggeráđiin, gos energiijaáššit leat áššelisttus.