Stuora petroleagávnnus Barentsábis

Operatevra Statoil lea searválagaid ENIiin ja Petoroin gávdnan oljju Skrugard oljobohkanguovllus oarjedavábealde Hámmarfeastta. Dát lea stuorimus petroleagávnnus Barentsábis maŋŋil Goliat mii dáhpáhuvai jagi 2000.

Operatevrra gaskaboddosaš resursalogut čájehit gaskal 150 ja 250 miljovnna oljolihti rokkahahtti oljoresurssaid, ja vejolašvuođat leat vel 250 miljovnna oljolihti. Oktiibuot gitta 500 miljovnna oljolihti.

- Dát lea stuora mearkkašupmi petroleadoibmii Barentsábis. Gávdnosat dákkár sturrodagas čájehit  ahte leat ain ovdánahttin vejolašvuođat norgga nannánjuolggi siskkobealde.  Petroleagávdnosat mat sáhttet buktit ođđa siskkáldas struktuvrraid leat erenoamáš dehálaččat sihkkarastimis investeren- ja doaibmadási jotkkolašvuođa davvin, cealká oljo- ja energiijaministtar Ola Borten Moe.

Petroleagávnnus lea gávdnon oljobohkanlobis 532, sullii 100 km eret Snøhvit-guovllu. Ráđđehus mearridii bohkanlobi jagi 2009, mii lei oassin 20. konsešuvdnavuorus. Jos resursalogut duođaštuvvojit, de lea dát petroleagávnnus dan mađe stuoris ahte dohko jáhkkimis lea dárbu hukset sierra bohkanrusttegiid.  
Barentsábis leat dál jođus olu doaimmat iešguđetge dásis:
• Snøhvitguovllus leat barggut jođus, ja árvvoštallojuvvo viiddidit doaimmaid
• Goliat lea huksema vuolde
• Moanat oljobohkamat galget dahkkot jagi 2011 ja 2012
• Barentsáhpái lea stuora beroštupmi, sihke TFO:s ja nummarastojuvvon konsešuvdnavuoruin
• Barentsábi ja Lofuohta hálddašanplánain leat ođđa areálat várrejuvvon boahttevaš juohkimiidda
• Rahpanproseassa  máttabealde ovddeš riidovuloš guovllu lahka Ruošša lea mearriduvvon

- Dáinna petroleagávdnosiin leat buot váillahuvvon bealit sajis maidda lea dárbu ovddidit    Barentsábi petroleaprovinsan guhkit áigái. Mu áigumuš lea ahte mii ovttas galgat geavahit dáid vejolašvuođaid ráhkadit buriid bargosajiid Davvi-Norgii ja nu nannet dán guovllu.  Ovddabealde leat mis olu gelddolaš jagit Norgii oppalaččat ja Davvi-Norgii erenoamážit, dadjá Ola Borten Moe.

Viđji  kártii (Oljodirektoráhtta).