Mii hukset Norgga - rávdnjefierbmedieđáhus ovddiduvvon

Oljo- ja energiijaministtar Ola Borten Moe geigii odne rávdnjefierbmedieđáhusa ”Vi bygger Norge – om utbygging av strømnettet” (Mii hukset Norgga – rávdnjefierpmi huksema birra, Stuorradiggedieđáhus 14 (2011-2012). Dieđáhusas ovdanbuktojuvvo ráđđehusa politihkka el-rávnnji váldogaskkustanfierpmi huksema ja investeremiid hárrái.

- Mii fertet investeret ollu rávdnjefierbmái ja dan láhkai sihkkarastit árvoráhkadeami ja rávnnji sihkkaris doaimmaheami olles riikii. Fertet maid láhčit dilálašvuođaid ođasmuvvi energiija huksemii, oljo- ja energiijaministtar Ola Borten Moe dadjala.

Dieđáhusas ovdanbuktojuvvo rávdnjefierbmepolitihkka, mainna ovddidit ráđđehusa ulbmiliid:

• Sihkaris rávdnjedoaimmaheapmi riikka buot osiide
• Viiddis ođasmuvvi rávdnjebuvttadeapmi
• Ealáhusaid ovddideapmi, mii gáibida eanet rávnnji olámuddui, omd. olgoriikka rávnnji petroleum- ja industriijadoaimmaide
• Doarvái buorre sirdinkapasitehta guovlluid gaskka, nu ahte sierra guovlluid rávdnjehattiide eai beasa šaddat stuorra erohusat guhkes áigái
• Energiijavuogádat, mii váldá vuhtii dálkkádaga, luonddugirjáivuođa, báikkálaš servodagaid ja eará servodatberoštumiid

Ráđđehus árvala rávdnjefierbmedieđáhusas rievdadit dálá doaibmalohpevuogádaga muhtin veardde. 

Ráđđehus árvala, ahte go rávdnjefierbmefitnodagat árvvoštallet rávdnjefierbmedoaimmaid dárbbu ja molssaevttolaš váldočovdosiid, de galgá olggobeale aktevra kvaliteahtasihkkarastit árvvoštallama. Dan maŋŋá departemeanta addá politihkalaš cealkámuša dárbbuid birra ja konseaptaválljema birra, go ášši leamaš vuos almmolaš gulaskuddamis. Dakkár dárbbuid ja konseaptaválljema árra politihkalaš čielggadeapmi dahká, ahte meannudanáigi dan maŋŋá oatnu. NVE lea nu mo dán áiggige váldoeiseváldi doaibmalobiid ektui. Rávdnjefierbmedieđáhusas deattuhit man mávssolaš lea, ahte dat geat áššái háliidit váikkuhit besset searvat proseassaide, maid NVE lágida.

Ráđđehus árvala maid, ahte mearridanváldi loktejuvvo Gonagassii stáhtaráđis. Dat mearkkaša, ahte NVE ii šat daga vuosttaš instánssa mearrádusaid, maid sáhttá váidalit. Buohkat, geaidda ášši guoská, besset goittotge ovddidit cealkámuša NVE árvalusa hárrái, go ášši vuos sáddejuvvo gulaskuddamii. Departemeanta árvvoštallá vuogi demokráhtalabbon ja beaktilabbon.

- Stuorra fápmojohtasiid mearrádusat leat mávssolaš politihkalaš válljemat. Mii dárbbašit boahtteáiggis rávdnjefierpmi investeremiid, ja danin fertet beavttálmahttit doaibmalobiid meannudeami. Dan dahkat árvalusaiguin, maid mii leat ovddidan, ja mat maid čielggasmahttet politihkalaš válljemiid, oljo- ja energiijaministtar Ola Borten Moe cealká.