Ruhtadanministara cealkámuš Norgga Báŋkku reantomearrádussii

- Norgga Báŋkku mearrádus odne ahte lasihit stivrenreanttu 0,25 proseantaosiin, 2,0 prosentii,  čuovvu daid signálaid maid Norgga Báŋkku celkkii ruhtapolitihkalaš raporttas njukčamánus.  Mun mearkkašan ahte váldostivra maiddái lea árvvoštallan evttohusa ahte ii rievdadit reanttu  dainna várain ahte Eurohpás sáhttá ahtanuššan hedjonit ovddasguvlui, dadjá ruhtadanministtar Sigbjørn Johnsen. 

- Eahpesihkarvuohta riikkaidgaskasaččat lea erenoamážit čadnon daid stuorra hástalusaide mat olu riikkain leat almmolaš bušeahtaid ja velggiid ektui, lohká ruhtadanministtar.  

- Dán jagi bálkášiehtadallamat leat bures boahtán johtui, ja priváhta suorggis leat juo soabadan máŋgga áššis. Šiehtadallamat leat erenoamážit váldán vuhtii gilvogilládeaddji  suorggi. Dál lea hui dehálaš ahte joatkevaš šiehtadallamat veahkehit  Norgga ekonomiija buorebut ahtanuššat ja ahte "frontfagmálle" dorjojuvvo, lohká ruhtadanministtar. 

- Ráđđehus almmuha boahtte vahkus bušeahtta árvalusa ja das vuoruhuvvo stáđis ekonomiija ahtanuššan, ja guovddáš ulbmil lea ahte máhccat ruovttoluotta njealjeproseanttamihttui. Mii fertet dál váldit vára das maid mii dán rádjái leat olahan, seammás go mii guhkit áigái hukset dássedettolaš ja buori ovdáneami norgga ekonomiijai.   Hábmedettiin ekonomalaš politihka, lea Ráđđehus váldán vuhtii gilvogilládeaddji suorggi ja daid geatnegasvuođaid  mat stáhtas leat guhkit áiggi vuollai, lohká ruhtadanministtar.