Jagi 2011 bušeahtta ođđa logut

Finánsadepartemeanta lea otne buktán ovdan proposišuvnna jagi 2011 stáhtabušeahta ođđa sáldema birra. Dás čilgejuvvojit jagi miehtá mearriduvvon ja árvaluvvon nuppástuhttimat stáhtabušehttii ja vearuid ja divadiid meroštallojuvvon nuppástuhttimat. Struktuvrralaš, oljorehketdoalu maŋŋásaš vuollebáza jagis 2011 meroštallojuvvo dál 99 miljárdda kruvdnun, mii lea 9,8 miljárdda kruvnnu unnit go meroštallojuvvon Jagi 2012 nationálabušeahtta. Oljoruđaid meroštallojuvvon geavahus jagi 2011 lea 24,3 miljárdda kruvnnu, 4-proseantta vuollelis go kapitála Stáhta penšuvdnafoanddas olgoriikkas. Seammás lea oljorehketdoalu maŋŋásaš vuollebáza njeidojuvvon 22 miljárdda kruvnnuin, 84,2 miljárdda kruvdnun.

Ráđđehus mearridii geavahit oljoruđaid jagis 2011 seammá dásis go 2010. Dát mielddisbuktá 128, 1 miljárdda kruvnnu vuollebáhcaga stáhtabušehttii jagi álggus, go stáhta petroleasisaboađut eai leat mielde ja go konjunktuvrralaš váikkuhusat rievddadit, gč. tabealla dás vuollelis. Mihtiduvvon struktuvrralaš vuollebáhcaga nuppástuvvamis nannánekonomiija árvoháhkama oassin, mielddisbuvttii árvaluvvon bušeahtta 0,2 proseantta geahpedeami. Oljoruđaid meroštallojuvvon geavaheapmi lea 7,4 miljárdda kruvnnu eambbo go vurdojuvvon reálavuoitu Stáhta penšuvdnafoanddas olgoriikkas.

Nuppástusat Jagi 2011 reviderejuvvon našunálabušeahta oktavuođas unnidii struktuvrralaš, oljorehketdoalu maŋŋásaš vuollebáhcaga 128,1 miljárdda kruvnnus 112,9 miljárdda kruvdnun. Nannánekonomiija vearuid ja divadiid meroštallan lassánii 13 miljárdda kruvnnuin, eanaš vearrosisaboađuid geažil (struktuvrralaš vearut). Eará poasttaid sisaboađuid geažil lasihuvvui bušeahtta 2,2 miljárdda kruvnnuin, eanaš lassánan vuoitoboađuid geažil.

Jagi 2012 našunálabušeahtas vuoliduvvui struktuvrralaš, oljorehketdoalu maŋŋásaš vuollebáhcaga meroštallan 108,8 miljárdda kruvdnui. Struktuvrralaš vearut lasihuvvojedje 4 miljárdda kruvnnuin.

Struktuvrralaš, oljorehketdoalu maŋŋásaš vuollebáhcaga meroštallan vuoliduvvo vel eambbo dál. Ođđa dieđut dienasjagi 2010 livnnetloguid ja vearrorehketdoalu birra čájehit ahte fitnodagaid vearut lassánedje hirbmadit earret oljodoaimmas jagis 2009 jahkái 2010, ja eambbo go mii Jagi 2012 našunálabušeahtas lei meroštallojuvvon. Maiddái persovnnalaš vearromáksiid vearut lassánedje eambo go álggos meroštallojuvvon. Ođđa dieđut mielddisbuktet ahte struktuvrralaš vearuid meroštallan lasihuvvo sullii 3 miljárdda kruvnnuin jagi 2011.

Eará oasit earret vearut ja divadat mielddisbuktet ahte struktuvrralaš, oljorehketdoalu maŋŋásaš vuollebáhcaga meroštallan njiedjá 6,8 miljárdda kruvnnuin jagi 2011 meroštallama ektui Jagi 2012 našunálabušeahtas. Jagi 2011 struktuvrralaš, oljorehketdoalu maŋŋásaš vuollebáza meroštallojuvvo 99 miljárdda kruvdnui, mii lea 9,8 miljárdda unnit go mii Jagi 2012 našunálabušeahtas lea biddjojuvvon vuođđun.

Mihtiduvvon nannánkapitála árvoháhkama oassin meroštallojuvvon struktuvrralaš, oljorehketdoalu maŋŋásaš vuollebáza njiedjá 0,6 proseanttain jagis 2010 jahkái 2011. Jagi 2011 bušeahtta lea de veháš unnit go álggos árvvoštallojuvvon.

Maŋŋágo Stuorradiggi mearridii bušeahta diimmá čavčča, de lea oljorehketdoalu maŋŋásaš vuollebáhcaga meroštallan stáhtabušeahtas geahpeduvvon 50,8 miljárdda kruvnnuin. Nannánekonomiija lassi vearrosisaboađut leat erenoamážit váikkuhan geahpedeapmái, áinnas ealáhusaid aliduvvon vearuid geažil mat eai lean Jagi 2011 našunálabušeahtas mielde, eambo vuoitoboađut ja unniduvvon reantogolut. Jagi 2011 oljorehketdoalu maŋŋásaš vuollebáza meroštallojuvvo dál 84,2 miljárdda kruvdnun. Dát vuollebáza gokčojuvvo seammá sturrosaš ruhtasupmiin Stáhta penšuvdnafoanddas olgoriikkas.

Netto ruhtaboahtin petroleadoaimmain stáhtii jagi 2011 lea meroštallojuvvon lassánit sáldejuvvon bušeahtas 64,5 miljárdda kruvnnuin, 352,5 miljárdda kruvnnu rádjai. Lassáneapmi lea eanaš dannego petroleahattit jagis 2011 leat alibut go dat mii lei meroštallojuvvon diimmá čavčča.

Duohta, vuollálas gollolassáneapmi jagi 2011 stáhtabušeahtas meroštallojuvvo dál 21/4 proseantan, mihtiduvvon jagi 2010 rehketdoalu ektui. Dát lea sullii seammá go dat mii Jagi 2011 našunálabušeahtas lei ovddiduvvon. Nominála, vuollálas gollolassáneapmi lea meroštallojuvvon 5,7 proseantta.

Jagi 2011 meroštallamat iešguđet áiggiid. Mrd.kruvnnut ja proseanta

	NB11 (čakčat 2010)	RNB11 (giđđat 2011)	NB12 (čakčat 2011)	Ođđasáldejuvvon (dál)
A) Oljorehketdoalu maŋŋásaš vuollebáza, mrd. kruvnnu	135,0	115,8	106,1	84,2
B) Struktuvrralaš, oljorehketdoalu maŋŋásaš vuollebáza, mrd. kruvnnu	128,1	112,9	108,8	99,0
C) Einnostuvvon foandavuoitu, mrd. kruvnnu	120,7	123,2	123,2	123,2
D) Gaska 4 prosentii (B-C), mrd. kruvnnu	7,4	-10,3	-14,5	-24,3
E) Bušeahttamannolat, proseanttat*	-0,2	-0,3	-0,3	-0,6
F) Duohta vuollálas gollolassáneapmi, pst.	2,3	2,8	2,8	2,2
G) Stáhtabušeahta ja Stáhta Penšuvdnafoandda badjebáza, mrd. kruvnnu	266,1	313,0	339,4	372,5

*Struktuvrralaš, oljorehketdoalu maŋŋásaš vuollebáhcaga nuppástuhttimat mihtiduvvon oassin Nannán-Norgga BNP-loguin

Gáldu: Finánsadepartemeanta

Dárkilat dieđuid gávnnat dáppe: Prop. 45 S (2011-2012)