Almmolaš lávdegoddi árvvoštallá bálkágaskavuođaid

Almmolaš lávdegoddi geahčadišgoahtá lagabui man vuođul Norgga bálkkát meroštallojuvvojit. Dat čielggai, go ráđđehus čoahkkimasttii odne bargoeallima oasálaččaiguin. Čoahkkimis guorahalle maŋimuš jagiid bálkášiehtadusaid.

– Dan lassin, ahte lávdegoddi geassá čoahkkái jagi bálkášiehtadusaid, de berre lávdegoddi árvvoštallat vásáhusaid das, man vuođul bálkkáid leat meroštallan maŋimuš 12 jagi áigge, mat leat vássán dan rájes go ásaheimmet doaibmanjuolggadusa ja ruhtapolitihka inflašuvdnaulbmila. Lávdegoddi galgá maid ságaškuššat makroekonomiija iešvuođaid, mat soitet hástalit norgga ekonomiija ja bálkágaskavuođaid boahtteáiggis, stáhtaministtar Jens Stoltenberg dadjala.

Oslo universitehta professor Steinar Holden jođiha lávdegotti, mii čohkkejuvvo seammá sullasaččat go Holden II-lávdegoddi. Logi jagi dassái Holden II-lávdegoddi geahčadii Norgga bálkágaskavuođaid dan vuođul, ahte njukčamánus 2001 ásahedje ruhtapolitihka inflašuvdnaulbmila ja ruhtadanpolitihka doaibmanjuolggadusa. Holden II-lávdegoddi lei áššedovdilávdegoddi, mas bargoeallima oasálaččain ledje ovddasteaddjit.

–Dat ahte politihkalaš eiseválddit ja bargoeallima oasálaččat gulahallet bures lea mávssolaš boahtopolitihka ovttasbargui, stáhtaministtar Jens Stoltenberg nannesta.

Ruhtadandepartemeanta almmustahttá lagamus áiggis bargoviidodaga govvádusa ja lávdegotti dárkilut čohkiidusa.