Doaimmat dákseealáhusa vearrobeaitima vuostá

Ráđđehus árvala ásahit dákseguovddážiidda geatnegasvuođa almmuhit dákseeaiggáda gávpejoru ja eará dieđuid vearro- ja divateiseválddiide. – Árvalus lea mávssolaš vuohki hehttet vearrobeaitimiid ja gullá Ráđđehusa doaibmaplánii ekonomiijarihkkosiid vuostá, ruhtadanministtar Sigbjørn Johnsen dadjala.

Oslo dákseealáhus lea máŋgii dárkkistuvvon 1990-logu álggu rájes, ja lea čájehuvvon ahte stuorra oassi gávpejorus báhcá vearuhusa olggobeallái.
- Oslo dákseealáhusa vearrobeaitin lea čájehuvvon nu viiddisin, ahte dan vuođul seahtit ballat, ahte nu dahkkojuvvo eará sajiid maid. Danin lea mávssolaš ásahit erenoamáš doaimmaid dán suorggis, ruhtadanministtar Sigbjørn Johnsen cealká.

Goalmmát oassebeali dieđuid almmuheapmi lea mávssolaš gaskaoapmi, mainna sihkkarastit ahte buot vearromáksijoavkkut čuvvot vearro- ja divatnjuolggadusaid. Almmuhanortnega lea álki ásahit, danin go relevánta dieđuid earret eará gávpejoru birra registrerejit jo dán áigge guđege dáksses, taksamehtera bargovuorrobáhpárii. Bargovuorrobáhpára doaimmahit dákseguovddážiidda. Dákseguovddážat galget dál juohke jagi almmuhit daidda gullevaš dákseeaiggádiid gávpejoru ja eará dieđuid vearro- ja divateiseválddiide.

Ortnet mielddisbuktá, ahte vearroeiseválddit sáhttet buohtastahttit dieđuid, mat addojit vearrodieđáhusas ja ealáhusdieđáhusas daid dieđuiguin, mat dađistaga registrerejuvvojit taksamehteriin jagi áigge. Danin ii leat šat nu álki manipuleret bargovuorrobáhpára dieđuid, ja spiehkastemiid sáhttá fuomášit jo livnnetmeannudeami áigge. Jos almmuhuvvojit váilevaš dieđut, de gustojit livnnetlága njuolggadusat, maid vuođul ferte máksit divada, jos almmuha dieđuid maŋŋit dahje ii oba almmutge dieđuid.