EDAG álkidahttá ealáhusaid barggu

Ráđđehus árvala ođđa oktasaš ortnega, mainna bargoaddi almmuha bargiid- ja boahtodiliid Vearroetáhtii, Bargo- ja čálgoetáhtii (NBČ) ja Statistihka guovddášdoaimmahahkii. Árvalus sisdoallá elektrovnnalaš gulahallama bargoaddiin (EGBA) ja dat galgá ovddimusat álkidahttit dieđuid raporterema, nu ahte bargoaddi ii dárbbaš doaimmahit seammáid dieđuid máŋgii.

- Mii vuoruhit ealáhusaid barggu álkidahttima, ja Ráđđehus nanne, ahte lea hui dehálaš geahpedit ealáhusaid hálddahuslaš barggu. Stuorra oassi dan barggus laktása bargoaddi doibmii, ja das leage buorit vejolašvuođat ollašuhttit buoret ja čeahpibut bálddalastojuvvon čovdosiid, ruhtadanministtar Sigbjørn Johnsen dadjala.

Dálá dilis bargoaddit almmuhit muhtin veardde seammáid dieđuid bargiid, bálkkáid ja vearrogeassimiid birra sihke Vearroetáhtii, NBČ:i ja Statistihka guovddášdoaimmahahkii. Dieđuid addimiin leat sierra áigemearit ja dat addojit sierra vugiiguin. Ráđđehus árvala ásahit EGBA, mii lea ođđa, oktasaš ortnet, mas bargoaddi unnimusat oktii mánus doaimmaha bálkádieđuid ja sullasačča guđege bargi birra. Ortnet mielddisbuktá de, ahte ollu dálá dieđáhusain ja skoviin, ovdamearkka dihte bálká- ja geassindieđáhus, ii šat geavahuvvo. Ortnet eaktuda, ahte eanaš dieđuid doaimmahit elektrovnnalaččat, ja ahte dat buvttaduvvojit bálká- ja bargisuorggi fágavuogádagain, maid bargoaddit geavahit. Bargoaddit, geain eai leat dakkár vuogádagat, sáhttet geavahit neahttabálvalusa, muhto gaskaboddasaččat beassá maid sáddet dieđuid báberhámis.

Ortnegiin rehkenastet bargoaddiid seastit sullii 500 miljovnna kruvnno. Ortnega loahpalaš hápmi váikkuha dasa man ollu bargoaddit duohtavuođas sestet, muhto sáhka lea goit stuorra seastimiin. Beaktilvuohta maid lassána, doaimmaid čađahit buorebut ja almmolaš bálvalusat buorránit.

Ráđđehus árvala ásahit sierra lága, mii mudde ortnega, nu ahte njuolggadusat leat álkit bargoaddiid ja boađuid vuostáiváldiid olámuttos.