Nannusap báŋŋkasihkarasstemfoannda ja ruváp máksema ruhtabiedjamduodastusårnigin

Finansdepartemænnta oajvvat nannit kapitálav Bankaj sihkarasstemfåndajn ja binnedit máksemájggemierev ruhtabiedjamårnigin. – Rievddama sjaddi oassálasstet oaggitjit ruhtabiedjamijt vuona báŋkajn jus hæhkkat báŋka båhti ekonomalasj gássjelisvuodajda. Dát le buorre juohkkahattjaj, javllá finansministar Sigbjørn Johnsen.

Departemænnta oajvvat rievddadit mærrádusáv báŋŋkasihkarasstemlágan divudisá máksema birra Báŋkaj sihkarasstemfoanndaj. Oajvvadus merkaj báŋka gudi li oasse Báŋkaj sihkarasstemfoandas juohkka jage galggi mákset divudav sihkarasstemfoanndaj. Guoskavasj riektáj milta máhttá divut gáhtot jus foanda kapitálla sjaddá muhtem mieres stuoráp. Dákkir divutbessam le vattedum moaddi maŋemus jagijt, maŋemusát jagijn 2012 ja 2011.

- Ájnas le báŋka oassálassti kapitálajn Báŋkaj sihkarasstemfoanndaj juohkka jage, vaj foannda máhttá stuoreduvvat ja buorebut máhttet giehtadallat hiedijt stuoráp báŋkajn ja gássjelisvuodajt ma guoskadalli moadda báŋkajt sæmmi bále. Vuonan le buorre ruhtabiedjamduodastus ja viehka stuorra báŋŋkasihkarasstemfoannda jus ietjá rijkaj buohtastahttá, valla foannda le huoman unne buohtastahtedum máhttelis vælggogisvuodajt sihkarasstemfåndan jus hiehte boahtá, javllá finansministar Sigbjørn Johnsen.

Báŋkaj sihkarasstemfoannda kapitálla lij 22,7 mrd. kråvnå 2011 jage maŋegietjen, mij le birrusin 2,6 prosenta duodastum ruhtabiedjamijs sebrulasj báŋkajn. Oajvvadum láhkarievddama hiebadahtti vaj foannda boahtteájgen galggá máhttet liehket stuoráp oasse duodastum ruhtabiedjamis.

Departemænnta aj oajvvat binnedit Báŋkaj sihkarasstemfoanda ájggemierev mávsátjit duodastum ruhtabiedjamijt gå nágin báŋŋka ij nagá ietjas åvdås mákset. Láhkarievddam merkaj sihkarasstemfoannda galggá gåbttjåt massemav duodastum ruhtabiedjamijs nav ruvva gå máhttelis ja maŋemusát vahko maŋŋela gå Finansbærrájgæhttje le javllam báŋŋka ij jali ij sidá ruhtabiedjamijt ruoptus mákset, jali jus le mierredam báŋkav almulasj háldadime vuolláj biedjat. Guoskavasj riektáj milta le guhkemus máksemájggemierre gålmmå máno.

- Gålmmå máno máksemájggemierre ij le dåhkkidahtte udnásj ekonomijan, gånnå adno elektråvnålasj máksemvuogijs le vijddásasj, ja gånnå ulmutjijn li hálvva binná rudá lijggen. Binnedit máksemájggemierev avta vahkkuj máhttá binnedit vahágahttemav ájnegis ulmutjijda gå báŋŋka ij nagá ruhtabiedjamijt mákset, mij aj oassálasstá stuoves finanssasystebmaj, javllá finansminisstar Sigbjørn Johnsen.

Láhkaposisjåvnnå le oajvvadam finansbærrájgæhttjamlága, báŋŋkasihkarasstemlága ja dåjmadakpensjåvnnålága rievddamav.