OECD riikkaraporta norgga ekonomiija birra

Ekonomiija ovttasbarggu ja ovdáneami organisašuvdna (OECD) geigii odne raporttas norgga ekonomiija birra.

 
Ruhtadanministtar Sigbjørn Johnsen giitá OECD Patrick Lenain ja Paul O’Brien raporttas, maid soai geigiiga. Govven: Tor Martin Bærum/Ruhtadandepartemeanta

- OECD norgga ekonomiija árvvoštallan lea ávkkálaš norgga eiseválddiide. Mun oainnán, ahte OECD deattuha, ahte ruhtadan- ja ruhtapolitihka njuolggadusat ja Stáhta olgoriikkapenšuvdnafoanda leat stuorra ávkin Norgii. Daid árvvoštallamiid hárrái mun lean ollásit ovtta oaivilis, ruhtadanministtar Sigbjørn Johnsen dadjala. Ekonomiijapolitihka rámmat ovddidit ekonomiija nanusvuođa oanehis áigodagas ja nana almmolaš ruhtadeami guhkes áigodagas. Mun oainnán, ahte OECD oaivvilda dáid rámmaid váikkuhan dasa, ahte Norga lea ceavzán bures riikkaidgaskasaš ruhtadanroasus.

- OECD čujuha dasa, ahte Norga birge bures riikkaidgaskasaš buohtastahttimiin, main geahčadit buorredili ja eallinkvaliteahta. Fuomášan maid, ahte OECD oaidná, ahte dat lea oktavuođas min vugiin organiseret servodaga, man ássit leat buori muddui ovttaárvosaččat, ovttaiduvvan ja oadjebasat. Dat kvaliteahtat eai dárbbaš gillát go ekonomiija ovdána, baicce nuppi gežiid, ruhtadanministtar nannesta.

- OECD čujuha raporttas dasa, ahte Norggas leat ollugat eret barggus buohcama geažil ja bargonávccahisvuođapenšuvnnas. OECD čállá, ahte ferte vihkkedallat doaimmaid, maid Ráđđehus lea johttáhan daid surggiin, dađistaga go vásihit mo dat doibmet. Jos dat eai doaimma ulbmila mielde, berre árvvoštallat maiddái eará doaimmaid. OECD čujuha dakko norgga ekonomiija mávssolaš hástalusaide, Sigbjørn Johnsen dadjala. Mii leat johttáhan dárbbašlaš doaimmaid, ja čuovvulit daid. Bargofápmu lea min mávssoleamos valljodat, ja mii fertet fuolahit, ahte nu ollugat go vejolaš sáhttet searvat bargoeallimii. Dat lea buoremussan sihke ovttaskas olbmui ja oktasašvuhtii, ruhtadanministtar lasihastá.

- OECD Norgga raporta sisdoallá dán vuoru guokte vuđolut kapihttala, nubbi kapitálavearuheami birra ja nubbi almmolaš suorggi beaktilisvuođa birra. Ráđđehusas lea alla áigumušat dan hárrái mo ovddidit čálgostáhta, ruhtadanministtar dadjala. Beaktilis vearuheapmi ja beaktilis ávkkástallan valljodagaiguin lea dan oktavuođas mávssolaš. OECD ávžžuhusat veahkehit min, go bargat dáid gažaldagaiguin.

Nehtta-TV preassakonferánssas
Presentašuvnna čuovgaárkkat
Riikkaraportta birra OECD neahttasiiddus
Overview of the Economic Survey of Norway