Olgoriikkas doaibmi fitnodagat fertejit almmuhit vearu

Norga áigu ásahit nu gohčoduvvon riikkas-riikii-raporterema, mii mielddisbuktá, ahte olgoriikkas doaibmi fitnodagat fertejit almmuhit, man ollu sii mákset olgoriikka eiseválddiide. Go ruhtadanministtar Sigbjørn Johnsenii geigejuvvui vuolláičáluslistu ášši doarjjan, son beasai vásihit doarjjajoavkku, mii ovddidii ášši gilljasiin.

(Geahča filmmaža artihkkala loahpas. Artihkal joatkašuvvá gova vuolábealde.)

 
Viečča buoret kvaliteahta veršuvnna(Foto: Tor Martin Bærum/Finansdepartementet)

Riikkas-riikii-raporteren (RRR, dá. Land-for-land rapportering) mielddisbuktá, ahte dihto fitnodagat fertejit almmuhit, man ollu sii mákset eiseválddiide dain riikkain, main sis leat doaimmat.

- Ulbmil lea čalmmustahttit gosa ruhtarávdnji golgá ja dahkat oinnolažžan daid riikkaid eiseválddiid ovddasvástádusa, mat ožžot boađuid iežaset luondduvalljodagain, ruhtadanministtar Johnsen dadjala.

- Mun lean rámis das, ahte Norga geahččala ovddimuččaid searvvis hehttet vearrobeaitimiid. Geafes riikkat dárbbašit vearroboađuid, maiguin sii sáhttet áŋgiruššat dearvvašvuođa ja oahpu ovdii. Danin raporteren berrege maid čájehit makkár gaskavuohta lea máksojuvvon vearu ja guovllus vižžojuvvon luondduvalljodagaid gaskkas, ovddidanministtar Heikki Holmås nannesta.

EO-kommišuvnna RRR-njuolggadusaid árvalus meannuduvvo dál Ráđis ja Europarlameanttas. Norgga eiseválddit áigot dál bargat EO oktavuođas dan ovdii, ahte EO:i ráhkadit nu buriid ja nana RRR-njuolggadusaid, go vejolaš, ja ahte RRR-njuolggadusat boađášedje fápmui olles EES-guovllus nu johtilit go vejolaš. Ráđđehusa ulbmil lea ahte Norgga RRR-njuolggadusat gustogohtet ođđajagimánu 1. b. 2014, vaikko dat boađášedjege fápmui EO:s easkka dan maŋŋá.

(Artihkal joatkašuvvá gova vuolábealde)


Viečča buoret kvaliteahta veršuvnna(Govva: Tor Martin Bærum/ Ruhtadandepartemeanta)

Ruhtadanministtar Sigbjørn Johnsen lea vásihan dán ášši hárrái erenoamáš beroštumi. Changemaker ja Girku heahteveahkki (Kirkens Nødhjelp) áŋgiruššet goabbáge dan beales, ahte ásahuvvojit riikkas-riikii-raporterema njuolggadusat, ja geigejedje dan olis ruhtadanministarii 38 500 vuolláičállosa, maiguin dorjo dakkár raporterengáibádusaid. Ášši doarjut leat maid ásahan sierra doarjjajoavkku, mas lea iežas neahttabáiki, filmmat, lávlagat, plakáhtat ja diehtogalbbat, maid ministtar beasai oaidnit.

Go doarjjajoavku vuolláičállosiid geigema oktavuođas gulai man oaivilis ráđđehus lea ášši hárrái, de gal olbmot ávvudišgohte gilljasiiguin ja ovttas lávlumiin. Ruhtadanministtar giitalii sin áŋgiruššama ášši ovdii.