Ráđđehus dieđiha ovddidandoaimmaid Nannán-Norgga ealáhuseallimii

Ráđđehus áigu čađahit doaimmaid 2014 rájes mat buoridit gilvonávccaid, lasihit gánnáhahttima ja nannejit investeremiid nannánfitnodagain. Dát dáhpáhuvvá vearrovuogádaga rievdademiin. Fitnodatvearru geahpiduvvo, Skattefunn nannejuvvo ja sisa fievrreduvvojit álgovuolidahttimat mašiinnaide je. Seammás čavgejuvvojit reantogessosat konsearnadilálašvuođain ja opmodatvearus.

Fitnodagaid vearromearri dábálaš dietnasis (eai persovnnalaš vearromáksit) vuoliduvvo otná 28 proseanttas 27 prosentii. Ráđđehus dainna váldá vuosttaš lávkki das ahte dahkat stuorát rievdadusaid fitnodatvearuhusas, mas vearromearit geahpiduvvojit ja ásahuvvo viidábut vuođđu. Vearrolávdegoddi (Scheel-lávdegoddi) mii nammaduvvui njukčamánus, boahtá árvvoštallat fitnodatvearu riikkaidgaskasaš ovdáneami ja vearrovuogádaga muđui ge ektui.

Seamma ládje go fitnodagaide, de áigu Ráđđehus geahpidit vearu iešbirgejeaddji ealáhusdolliid ealáhusdietnasis, dm. ovttaolbmofitnodagaide ja persovnnalaš oasseváldiide oassálasti livdnejuvvon servviin. Ráđđehus boahtá 2014 bušeahttaevttohusas čilget mot dat galgá čađahuvvot.

Vuoliduvvon vearromearit fitnodagaide ja ealáhusdolliide geahpida almmolašvuođa dietnasiid nannándoaimmaid birrasiid 3 miljárdda ruvnnuin.

Earenoamášvearru oljobohkamis ja čáhcefápmorusttegiid vuođđoreantovearru bajiduvvo 1 proseantačuoggáin, 51 prosentii ja 31 prosentii, nu ahte bisuha ollislaš vearromeari.

Movttiidahttin dihte vel eanet investeremiidda nannánealáhusain, de áigu Ráđđehus evttohit sisafievrredit álgovuolidahttimiid doaibmaomiide d sáldojoavkkus (mašiinnat je.) 10 proseanttain. Dat mielddisbuktá ahte vuolidahttinmearri doaibmaoami vuosttaš doaibmajagi bajiduvvo 20 proseanttas 30 prosentii. Ekonomalaš ovdamunni hoahpuhuvvon vuolidahttimiin meroštallojuvvo dahkat birrasiid 400 miljovnna ruvnno jahkásaččat.

Movttiidahttin dihte eambbo dutkamii ja ovddideapmái (DjO) ealáhuseallimis, de evttoha Ráđđehus nannet Skattefunnortnega 100 miljovnna ruvnnuin. Eanet servodatekonomalaš gánnáhahtti prošeavttat sáhttet dalle čađahuvvot. Doaibma boahtá luvvet eambbo innovašuvnna fitnodagain.

Ruhtadandepartemeanta sáddii cuoŋománu 11.b. gulaskuddamii evttohusa dan birra ahte ráddjet reantogollogessosiid konsearnadilálašvuođain. Evttohus boahtá hehttet ahte máŋgga - našunála konsearnat sirdet badjelbáhcagiid olggos riikkas ja dainna lágiin unnidit vearu mii máksojuvvo Norgii. Evttohus boahtá maiddái nannet rámmaeavttuid fitnodagaide mat gilvvohallet máŋgga - našunála fitnodagaiguin mat viidát barget vearroheivehemiin. Lassi dietnasat reantogessosa čavgemis, birrasiid 3 miljárdda ruvnno, leat veahkkin ruhtadeami bajábealde namuhuvvon vearrodoaimmaid.

Opmodatvearus sekundáraviesuid ja ealáhusopmodagaid árvobidjan bajiduvvo 50 proseanttas 60 prosentii meroštallojuvvon márkanárvvus. Eanet árvobidjan sekundáraviesuin sáhttá veaháš hehttet veaháš haddeovdáneami viessomárkanis. Meroštallojuvvo ahte stáhta dietnasat lassánit birrasiid 500 miljovnna ruvnnuin. Oktiibuot lea vearrogeahpádus ollásit ruhtaduvvon, Ráđđehusa vearrolohpádusa mielde. Evttohusaid birra čilgejuvvo eambbo Ođastuvvon našunálabušeahtas 2013. Evttohusat láhkarievdadusaide je. Ovddiduvvojit stáhtabušeahtas čakčii ja doaibmagohtet 2014 rájes.

Dasa lassin buoriduvvojit vearronjuolggadusat oljobohkanfitnodagaide. Rievdadusat sáhttet buoridit fitnodagaid gollodiđolašvuođa. Dát rievdadusat biddjojuvvojit leat fámus otná beaivvi rájes.

 

________________________________

Loga maid:

• Stáhtaministara preassadieđáhus: Ovddidanpáhkka ealáhuseallimii
• Ruhtadanministara preassadieđáhus: Ráđđehus dieđiha ovddidandoaimmaid Nannán-Norgga ealáhuseallimii
• Ruhtadanministara preassadieđáhus: Oljovearus- vuoliduvvon- friddjadienas
• Čuovgagovat ovdanbuktimis
• Neahtta-TV