Vearroetáhta kantuvrrat

Geassemánu 7. b. Nationen-áviissas čuoččuhit, ahte unna vearrokantuvrražiid heaittiheapmi lea ”vuot lávki dan guvlui, ahte buot čohkkejuvvo guovddážiidda”. Nu ii leat. Vearrokantuvrraid heaittihemiin eai čohkke bálvalusaid stuorámus gávpogiidda, eaige bargit celkojuvvo eret.

Vearroetáhta ráhkadussii gullet ollu unna kantuvrražat, mii hástala sihke fágalaččat ja ruđalaččat. Vearrodirektoráhtta áigu sihkkarastit dohkálaš fálaldagaid, vearromáksiid ovttaárvosaččabut meannudeami ja beaktilis resursageavaheami, ja leage dan nammii ožžon Ráđđehusas fápmudusa heaittihit uhca vearrokantuvrražiid, main leat eanemusat 4 bargi.

Vearroetáhtas ledje cuoŋománus 121 vearrokantuvrra, main ledje eanemusat 4 bargi. Go kantuvrrain leat gaskamearálaččat 1,2 bargi, de lea oalle lunddolaš ahte dain leat ráddjejuvvon resurssat ja unna, rašes fágabirrasat. Dat ii leat vearromáksiid iige bargiid ovdun. Stuorát ja stargasut fágabirrasat, mat sáhttet vuodjut dihto fáttáide, leat mávssolaččat dán áigge, go meannudit ain máŋggabealagat áššiid.

Unnimus kantuvrražiid heaittiheapmi ii olus váikkut daid gielddaid bálvalusfálaldahkii. Vearromáksit sáhttet ain muosáhit buriid bálvalusaid jogo elektrovnnalaččat dahje vearroetáhta telefonbálvalusa bokte (Skatteopplysningen). Rievdadusain eai čohkke bálvalusaid stuorámus gávpogiidda. Kantuvrraid heaittiheami oktavuođas etáhta bargá dan ovdii, ahte seammá guovllu lagaš kantuvrrat nannejuvvojit. Čáhcesuolu, Narviika, Harstad, Leikanger ja Molde leat dakkár gielddat, maidda leat maŋimuš jagiid lasihan doaimmaid ja bargiid.

Unna vearrokantuvrražiid heaittihit vehážiidda, ja ođđa ráhkadusa ektui gulahallet etáhta luohttámušolbmuiguin. Bargit eai celkojuvvo eret, ja heaittihuvvon kantuvrraid bargiide fállet barggu lagamus kantuvrrain. Dan láhkai čohkkejit guovlluide stuorát ja stargasut fágabirrasiid. Ulbmil lea doalahit ođđaáigásaš vearrohálddašeami, mii lea gearggus dustet servodaga ovdáneami.