Eanet stáhta ekonomiijastivrema birra

Ruhtadandepartemeanttas lea bajimuš ovddasvástádus stáhtahálddahusa ekonomiijastivremis ja dat mearrida buori ekonomiijastivrema prinsihpaid ja standárddaid. Stáhta ekonomiijastivrema fágasuorgái gullet stáhta buori stivrema ja beaktilis resursageavaheami gaskaoamit ja doaimmat, ja maiddái dat mo departemeanttat stivrejit stáhta doaimmaid (etáhtastivren), eaiggátstivren, doaimmaid siskkáldas stivren, doarjjaortnegiid hálddašeapmi, boađus- ja rehketdoalloraporteren, likviditehta hálddašeapmi, evalueren ja servodatekonomiija guorahallamat.

Stáhta ekonomiijastivrema ovddasvástádus gullá Ruhtadanossodaga Ekonomiijastivrensekšuvdnii. Sekšuvnna ovddasvástádus lea stivret ja čuovvulit Ekonomiijastivrema direktoráhta (ESD), ráhkkanit stáhtarehketdoalu stuorradiggedieđáhusa čállimii, nannet buori ekonomiijastivrema njuolggadusaid, prinsihpaid ja standárddaid (vrd. Stáhta ekonomiijastivrema njuolggadusat), ovddidit rámmaid dasa mo departemeanttat stivrejit stáhta doaimmaid ja fágasuorggi strategalaččat mávssolaš ovddidanprošeavttaid. Ekonomiijastivrensekšuvdna searvá riikkaidgaskasaš ja davviriikkalaš ovttasbargoforumiidda.

Ekonomiijanjuolggadusat ja operatiiva doaimmat, mat laktásit stáhta rehketdollui ja stáhta máksimiid gaskkusteapmái leat dábálaččat delegerejuvvon ESD:i. Ruhtadandepartemeanta hálddaša ain 1. kapihttala dokumeanttas Stáhta ekonomiijastivrema mearrádusat, mat gusket dasa mo departemeanttat stivrejit stáhta doaimmaid (etáhtastivren). ESD galgá ovddidit stáhta doaimmaid buori stivrema earret eará oktasaš doaimmaiguin, maiguin ovddidit diehtojuohkima, oahpahusa, rávvema ja bagadeami stáhtahálddahusa ekonomiijastivrema hárrái, raporteret stáhtarehketdoalu ođđa dieđuid ja hálddašit stáhta konsearnakonttu Norgga báŋkkus ja rámmašiehtadusaid báŋkkuiguin, mat gusket stáhta máksimiid gaskkusteapmái. Ohcamušaid njuolggadusain spiehkasteami hárrái ja jearaldagaid njuolggadusaid dulkoma hárrái galgá doaimmahit ESD:i.