Doaivu buriid bohtosiid ođđa skuvllas

Silje Tyrihjell (15) oaččui stáhtaministaris Jens Stoltenbergas vástádusa vuosttas skuvlabeaivvi.

Stáhtaministtar Jens Stoltenberg ja máhttoministtar Kristin Halvorsen álggaheigga skuvlajagi ovttas 300 ohppiiguin ođđa Fyrstikkallé skuvllas (F21) Helsefyr nammasaš báikkis Oslos.

Silje Tyrihjell eret Nordstrandas beasai jearrat ovtta gažaldaga stáhtaministaris buot ohppiid čalmmiid ovddas.  Son háliidii diehtit makkár vuordámušat stáhtaministaris leat ođđa skuvlii, mii oba riikkas lea vuosttas skuvla huksejuvvon nu gohčoduvvon 8 – 13 skuvlan (ovttastuvvon nuoraidskuvla ja joatkkaskuvla).  Son maid háliidii diehtit makkár bohtosiid stáhtaministtar vuordá dán ođđa skuvlla addit.

- Mun jáhkán ahte dii oažžubehtet hui buriid bohtosiid.  Dat ahte lea oktavuohta gaskal nuoraidskuvlla ja joatkkaskuvlla lea buorre danne go dalle lea vejolaš geavahit oahpaheaddjinávccaid buorebut.  Ja erenoamážit besset olu oahppit nuoraidskuvllas  vásihit maid joatkkaskuvla mearkkaša ja sii ožžot maid buoret áddejumi iešguđet válljenvejolašvuođaid birra. Okta dain deháleamos sivain manin muhtumat eai čađat joatkkaskuvlla lea ahte sii válljejit boastut, vástidii Stoltenberg.

Sihke Stoltenberg ja Halvorsen deattuheigga man dehálaš lea ahte eanet oahppit čađahit joatkkaoahpahusa.

- Eai goassige ovdal leat nu ollu nuorat álgán joatkkaskuvlii, muhto almmatge lea nu ahte okta golmma oahpis eai čađat oahpahusa. Dat lea duođalaš ášši.  Mii fertet dáinna áššiin bargat juoga. Danne almmuhat mii otne arvat doaimmaid uhcidit heaitimiid joatkkaskuvllas, vástidii Stoltenberg.

Silje Tyrihjell lea ilus go stáhtaministtar ja máhttoministtar oassálasttiiga vuosttas skuvlabeaivvi doaluin.

- Buohkaid mielas lei hui buorre go soai leigga dáppe.  Lei somá ja gelddolaš go bessen jearahit stáhtaministara, dadjá 15-jahkásaš.

Govva: Silje Tyrihjell jearahallamin stáhtaministara Jens Stoltenberga vuosttas skuvlabeaivvi.

• Loga eanet doaimmaid birra hehtten dihti skuvlaheaitima joatkkaskuvllas Máhttodepartemeantta ruovttusiidduin 
• Preassadieđáhus: Ođđa JOAČ hehttet skuvlaheaitima
• Doalut čájehuvvojit neahtta-TV:s
• Geahča govaid Flickr neahttabáikkis