Suoidnemánu 22.beaivve-kommišuvdna – stáhtaministara álggahansárdni preassakonfereanssas 12.08.2011.

Bures boahtin preassakonferensii,

Otne lea golbma vahku dassá go Norga vásihii bombema Oslos ja báhčimiid Utøyas.
Dan eahkeda lei min riika surgadis dilis.
Coavcceheapmin, ja eat ge diehtán mii lei vuordagis.
Mun lean čeavlái das mo Norgga álbmot hálddašii dán dáhpáhusa.
Mii guovdilasttiimet iežamet váldoárvvuid:
Demokratiija, rabasvuođa, oktavuođa.

Dat leat duddjon midjiide oadjebas vuođu vuostái váldit boahttevaš geahččalusaid.

Min riika lea ain morrašis.
Ain hávdádat mii iežamet jábmiid.
Ain vealládit garrasit roasmmuhuvvon olbmot buohcceviesuin.
Ain dárbbašit duháhiid mielde gillájeaddjit ja oapmahaččat miehtá riikka fuola ja veahki.

Sidjiide lea áibbas dárbbašlaš oažžut vástádusaid gažaldagaide.
Mii dáhpáhuvai? Manne?
Maiddái midjiide dego našuvdnan lea dát dehálaš.
Mii fertet oahppat  terrorfallehemiin.
Ulbmil lea ahte dákkár dagut eai galgga nuppes dáhpáhuvvat.
Ulbmil lea buoret dorvvolašvuohta.

Danne lea ráđđehus otne nammadan suoidnemánu 22.beaivve-kommišuvnna.
Dat lea min ja Norgga politihkkáriid lohpádusaid mielde maid almmuheimmet suoidnemánu 27.beaivve.
Kommišuvnna mandáhta ja čoahkkádus lea hábmejuvvon ovttas Stuoradikki parlamentáralaš jođiheddjiiguin.
Gulahallan Stuoradikkiin lea leamaš buorre.
Mii leat váldán vuhtii oainnuid ja árvalusaid mat leat boahtán eará bellodagain.

Kommišuvnna mandáhta lea kártet buot dárbbašlaš beliid dán dáhpáhusas.
Oažžut ovdan buot dieđuid.
Čiŋatkeahttá. Vuoiggalaččat.
Das lea árvu iešalddis.
Vai mii ovdánat našuvdnan de fertet mii leat oadjebasat das ahte mii oažžut diehtit buot mii lea dáhpáhuvvan.

Lassin oažžut albmosii dieđuid ja analyseret dáhpáhusaid, de kommišuvdna bivdojuvvo árvalit buoridandoaimmaid.

Ulbmil lea ahte Norga galgá ráhkkanan nu bures go vejolaš oažžun dihtii albmosii terrorfallehanplánaid.
Ja heađuštit boahttevaš terrorfallehemiid.
Unnidit váikkuhusaid vejolaš terrorfallehemiin.
Ja meannudit vejolaš ođđa roasuid nu bures go vejolaš.
Dás lea sáhka sihkkarvuođas ja dorvvolašvuođas.

Demokratiija dárbbaša goappašagaid.

Mii galgat sihkkarastit friija ságastallama ja min rabas ja luohtehahtti servodaga.
Seammás galgat mii fuolahit ahte olbmot sáhttet vánddardit oadjebasat gáhtaid mielde. Álbmot mii ballá ii leat friija álbmot.
Mii leat nammadan 10 olbmo sturrosaš kommišuvnna mii galgá doaimmahit dán dehálaš barggu. Oktiibuot lea dán kommišuvnnas viiddis ja dárbbašlaš gelbbolašvuohta: Politiijafágalaš. Juridihkka. Dearvvašvuohta. Gádjun. Gearggusvuohta. Almmolašvuohta.
Lea dehálaš buohtastahttit Norgga eará riikkaiguin máilmmis. Kommišuvnnas lea čehppodat internašunála fallehemiid ja politihkalaš veahkaváldimiid birra. Kommišuvnnas oasálastet ovddasteaddjit Norggas  ja min lagamus ránnjáriikkain.

Suoidnemánu 22. beaivve- kommišuvnna miellahtut:

Ragnar Auglend, Bergen
Ovddeš politiijameašttir Hordalandas ja ovddeš rektor Politiijaallaskuvllas. 
Auglend lea ovdal bargan duopmárin, ja dál bargá son dutkin juridihkalaš fakultehtas Bergenis.

Karin Straume, Čáhcesuolu,
Finnmárkku fylkkadoavttir
Straume lea servodatmedisiinnalaš medisiidnadoavttir.

Einar Enger, Rakkestad,
NSB ja Tine ovddeš direktevra.
Engeris lea viiddis hárjáneapmi ealáhuseallima jođiheaddjin

Laila Bokhari, Oslo,
Stáhtadiehtti, dutki ja girječálli erenoamáš suorggis terrorisma ja politihkalaš veahkaválddálašvuohta.
Bokhari lea bargan NUPI:s ja Suodjalusa Dutkaninstituhtas.
Son loahpaha dál doaimmaidis Norgga ambassádas Islamabadas.

Linda Motrøen Paulsen, Stavanger,
Rukses Ruossa Sadjásašpresideanta 2055 rájes.
Joatkkaskuvlla realfága ossodatjođiheaddji Stavangeris.

Torgeir Hagen, Ridabu,
Generalleutnánta.
Hoavda Suodjalusa vákšunbálvalusas jagi 2002 rájes 2009 rádjái. 

Guri Hjeltnes, Oslo,
Journalista ja historihkkár.
Journalista professor ja Gávpeallaskuvlla BI prorektor.
Ovddeš Politiijadirektevra Københámmanis. 

Hanne Bech Hansen, Hillerup

Ovdal lea son leamaš politiijameašttir Politiija Vákšunbálvalusas ja Københámmana, Fredriksberg ja Tårnby Stáhtaadvokáhta.

Lassin dáid ovcci olbmo de lasihuvvo kommišuvdna vel ovttain almmáiolbmuin.  Sus galgá leat politiija/gearggusvuođafágalaš gelbbolašvuohta ovtta min lagamus ránnjáriikkain.

Loahpas:

Lean ilus go Alexandra Bech Gjørv lea lohpidan jođihit kommišuvnna.

Son lea oasálaš advokáhttafitnodagas Hjort.

Sus lea alla juridihkalaš gealbu.  Nana jođihanhárjáneapmi.

Erenoamážit jođihit iešguđetlágan fágabirrasiid. Ekspearttaid. Ja oažžut sin ovttasbargat.  Son lea ovdal doaibman ođasmuvvi energiija direktevran Hydros ja maŋŋil Statoilas.

Alexandra Bech Gjørv adnojuvvo alla árvvus su fágalaš čehppodaga ja persovnnalaš iešvuođaid geažil.  

Dalle mun sávan kommišuvnna jođiheaddjái bures boahtin deike.