Stoltenberg almmuha ođđa dearvvašvuođaáŋggirdeami geafes riikkaid várás

- Ođđa nana álgga juksan dihtii dearvvašvuođasuorggi duhátjahkeulbmiliid. Ná válddaha stáhtaministtar Jens Stoltenberg dan riikkaidgaskasaš dearvvašvuođaguoibmelihtu maid son almmuhii Londonis otne ovttas brihttalaš stáhtaministariin Gordon Brown:in

Stoltenberg deaivvai stáhtaministara Brown, máŋga afrihkálaš ja ásialaš dearvvašvuođaministara ja gávcci stuorámus riikkaidgaskasaš dearvvašvuođaorganisašuvnna ovddasteaddjiid. Sii deaivvadedje searvat riikkaidgaskasaš dearvvašvuođaguoibmelihttui. Dáinna álgagiin áigot oassálastit bargat dan ala ahte gádjut miljovnnaid heakkaid dakko bokte ahte hukset buoret dearvvašvuođavuogádagaid muhtun geafimus riikkaide máilmmis.

Riikkaidgaskasaš dearvvašvuođaguoibmelihttu lea oassi ođđa máilmmiviidosaš áŋgiruššamis juksan dihtii dearvvašvuođasuorggi duhátjahkeulbmiliid – sihkkarastima bokte ahte mánát eai jáme, uhcidit etniid jámolašvuođa ja caggat stuorámus dávddaid.

- Juohke goalmmát sekundda jápmá mánná mii lea vuollel vihtta jagi boaris dakkár dávdii man sáhttá dálkkodit dahje eastadit, juohke minuhta jápmá seaŋganisu. Áhččin, ekonoman ja politihkkárin mun oaivvildan ahte dát ii leat moralalaččat dohkálaš ja oainnán dán duođalaš easttan geafes riikkaid ovddideapmái. Dušše geafes riikkaid dearvvašvuođavuogádagaid nannema bokte mii sáhttit johtileappot juksat dearvvašvuođasuorggi duhátjahkeulbmiliid, dadjá stáhtaministtar Jens Stoltenberg.

Riikkaidgaskasaš dearvvašvuođaguoibmelihttu bargá dan ala ahte dearvvašvuođaveahkkebargu galgá doaibmat buorebut geafes riikkaid várás ja jođálmahttit ovdáneami dainna lágiin ahte:

• buorebut oktiiordnet ruhtaaddiid
• deattuhit buoret dearvvašvuođavuogádagaid oppalohkái dan sadjái go deattuhit bođudávddaid dahje bođuáššiid
• ovddidit ja doarjut riikkaid iežaset dearvvašvuođaplánaid

Máilmmi dearvvašvuođaorganisašuvdna (WHO), Máilmmibáŋku, UNAIDS, UNFPA, GAVI-lihttu, UNICEF, Gates-vuođđudus ja ruhtaaddi riikkat nu go Norga, Stuorra Brittánnia, Duiska ja Frankriika geatnegahttet dál iežaset buorebut ovttasbargat vai uhccu dat noađđi maid addiid ja organisašuvnnaid stuorra lohku mielddisbuktá geafes riikkaide, ja dan sadjái buorebut doarjut daid dearvvašvuođadárbbuid maid geafes riikkat ieža leat gávnnahan dehálažžan. Oktiibuot ovddastit riikkaidgaskasaš dearvvašvuođaguoibmelihtolaččat beali dan ruhtadoarjagis mii addojuvvo dearvvašvuođaveahkkin máilmmis.

Burundi, Etiopia, Kenia, Mosambika, Zambia, Kampučea ja Nepala dervvašvuođaministarat serve otne riikkaidgaskasaš dearvvašvuođaguoibmelihttui. Sin oainnu mielde boahtá buoret oktiiordnen gaskal ruhtaaddiriikkaid ja riikkaidgaskasaš organisašuvnnaid sidjiide buorrin go sii áigot buoridit riikka dearvvašvuođabálvalusaid. Sii leat geatnegahttán iežaset lasihit almmolaš ruhtadeami dearvvašvuođabálvalusaide ja sihkkarastit ahte álbmoga geafimusat ožžot dearvvašvuođabálvalusaid almmá menddo stuorra goluid haga.