Deavdá vuojadanáldásiid

Stáhtaministtar Jens Stoltenberg rahpá dál odne Fuoskku vuojadanáldása Nordlánddas. Dán ráđđehusáigodagas leat badjel 70 vuojadanáldása rahppojuvvon, ođđasit rahppojuvvon dahje plánejuvvon divoduvvot. Eatnasat dain leat stuora rusttegat main leat máŋga vuojadanáldása, jurddašuvvon ollu geavaheaddjijoavkkuide.

– Háliidan sávvat lihku buohkaide Fuoskku ođđa vuojadanáldásiin. Vuojadanhálla lea buorre vuodjandoaimmaide suohkanis ja šaddá dehálaš čoaggananbáikin ássiide. Vuojadeapmi lea sihke stoahkan, falástallan ja dehálaš máhttu. Mii háliidit ahte nu ollugat go vejolaččat sáhttet searvat dasa doppe gos sii orrot, dadjá stáhtaministtar Jens Stoltenberg.

Fuoskku rusttet lea buorre ovdamearkan dasa ahte dálá vuojadanálddis divoduvvo ja rievdaduvvo nu ahte gokčá daid dárbbuid mat boahtteáiggis leat sihke vuđolaš vuodjanohppui ja falástallandoaimmaide. Fuoskku vuojadanáldás lea dál ožžon sullii 5,7 miljovnna ruvnno speallanruđain mat leat falástallanulbmiliid váste.

Ráđđehus áigu dán áigodagas nannet suohkanekonomiija sullii 28 miljárdda ruvnnuin. Dát, oktan speallanruđaiguin ja eaktodáhtolaš nákcabidjamiiguin, dagaha ahte máŋgga báikkis leat bargagoahtán fas rahpat, divodit dahje hukset ođđa vuojadanáldásiid. Ráđđehus vuoruha maiddái skuvllas buorebut vuodjanoahpahusa.

– Sáhttit lohpidit ahte midjiide lea mihá deháleappot buoridit čálggu báikkálaččat go geavahit miljárddaid vel eanet vearrogeahpádusaide sidjiide geain juo lea eanemusat ovdalaččas. Ráđđehus vuoruha buriid čálgofálaldagaid nugo vuojadanáldásiid, mánáidgárddiid ja boarrásiidfuolahusa, ja lea buorre oaidnit ahte suohkanat čuovvolit dan, dadjá Stoltenberg.