– Buori stivrema joavku

Odne almmuhii stáhtaministtar Jens Stoltenberg ráđđehusa nuppástusaid. Čieža stáhtaráđi leat ožžon ođđa doaibmamušaid ja čieža ođđa ráđđehuslahtu leat odne nammaduvvon.

Ráđđehus čoahkis Sloahttašiljus golggotmánu 20. beaivvi 2009. Foto: Scanpix.

- Lean hui rámis almmuhettiin dán joavkku odne. Dát lea ráđđehus mii áigu oaččohit áigái buriid searvevuođačovdosiid, árvoháhkama ja vuoiggalašvuođa. Ovttasráđiid mii áigut rahčat vai mii juksat iežamet ráđđehusvuođu ulbmiliid, cealká stáhtaministtar Jens Stoltenberg.
Ráđđehusas leat 10 nissona ja 10 albmá. Sin ahki lea 32 jagi rájes 66 jahkái ja buot riikkaoasit leat ovddastuvvon.

- Midjiide lea leamaš dehálaš ásahit ráđđehusa mas lea viidodat, danne lean ilus dan čoahkádusas mas leat ovtta ollu nissonat go albmát geat leat máŋgga agis, geain lea máŋggalágan duogáš ja geat leat eret sierranas guovlluin, dadjá Stoltenberg.
Otná stáhtaráđis stáhtaráđit Bjarne Håkon Hanssen, Sylvia Brustad, Heidi Grande Røys ja Bård Vegar Solhjell leat ožžon gutnálaš lihcu.

- Mu háliidan giitit sin áŋgiris barggu, dehálaš mearrádusaid ja buori ovttasbarggu ovddas. Sii leat leamaš mielde historjjálaš eanetlohkoráđđehusas. Sii leat leamaš mielde vuoitimin válgga. Ja sii leat ovddidan dakkár stuorra ja dehálaš áššiid ovddit áigodagas mat leat láhčán vuođu politihkkii mii galgá buoridit searvevuođa, árvoháhkama ja vuoiggalašvuođa, cealká Stoltenberg.

- Dat nuppástusat maid mii čađahit bargosurggiid ja departemeanttaid juogadeamis, galget váikkuhit buoret politihkalaš bohtosiidda. Dálkkádat lea deattastuvvon dehálažžan stáhtaráđiin gii erenoamážit galgá bargat riikkaidgaskasaš dálkkádatšiehtadallamiiguin. Searvadan- ja sisafárrensuorggit sirdojuvvojit bargo- ja searvadahttindepartemeanttas guovtti sierralágan stáhtáráđđái, ja dat basttálmahttá  min áŋgiruššama dáin surggiin. Bargu oažžu sierra departemeantta ja návccat čohkkejuvvojit bargat stuorra ođastusaiguin dan suorggis, dadjá Stoltenberg.

- Válgabohtosat čájehedje ahte bellodagat eai ožžon seamma ollu jienaid go ovddit válggas. Lunddolaš lea ahte dat boahtá ovdan departemeanttaid ja stáhtaráđiid juogadeamis, cealká Stoltenberg. Politihkalaš vuođđu mii buktojuvvui ovdan Soria Morias golggotmánu 7. beaivvi galgá leat ráđđehusa viidásat barggu vuođđun dán stuorradiggeáigodaga.