Eanet máškidis virgeluopmonjuolggadusat

Ráđđehus evttoha geahpidit gáibádusa man ollu bargoáigi galgá oatnut beaiveruđaid oažžumis virgeluomu oktavuođas  40 prosentii. Seammás evttohuvvo viiddidit gaskkalduhttináiggi go lea virgeluopmu barggu dihte, almmá oažžumis ođđa bálkágeatnegasbeaivvit ja vuordinbeivviid ovdal go beaiveruđaid oažžu, njealji vahkus guđa vahkkui.

– Dáid rievdadusaiguin šaddá álkit juogadit virgeluomuid, ollásit dahje belohahkii, eanet bargiid gaskkas ja guhkit áigodahkii. Evttohusat mihtet bargoeallima bealálaččaid garra sávaldagaid, dajai  stáhtaministtar Jens Stoltenberg go son odne galledii Eramet AS Saudas.

Bargomárkana dili dihte evttohuvvo ahte gáibádus dan ektui man ollu bargoáigi galgá oatnut beaiveruđaid oažžumis virgeluomu oktavuođas, geahpiduvvo 40 prosentii.  

Go geahpida gáibádusa bargoáiggi oatnuma hárrái láhččojuvvo vejolašvuohta oaččuhit eanet máškidis virgeluopmoortnegiid. Bargoáiggi oatnun 40 proseanttain dagaha álkibun čađahit ng. molssašuddi virgeluomuid.  Dálá 50 proseanta gáibádusa ektui, mearkkaša 40 proseanta guokte olles bargobeaivvi ovtta bargovahkus, mii daga álkibun virgeluomu čađahit.

Jus bargguhis virgeluomu gaskkalduhttá barggu dihte guhkit go njeallje vahku de dat dálá ortnega mielde mearkkaša ahte dat meannuduvvo dego ođđa virgeluopmun, mii fas mearkkaša ođđa bálkágeatnegas beivviid bálkágeatnegaslága mielde, ja ođđa vuordinbeivviid ovdal go fas sáhttá oažžut beaiveruđaid. Dát leage duogáš dasago gaskkalduhttináigodat viiddiduvvo guđa vahkkui. Bargoaddi sáhttáge juohkit virgeluomu ollásit dahje belohahkii eanet bargiid gaskkas guhkit áigái almmá šaddamis máksit ođđa bálkágeatnegas beivviid ovddas. Go njuolggadusat rivdet nu ahte sáhttá fas joatkit beaiveruhtaáigodagain maŋŋil go virgeluopmoáiggis lea bargan, de sii geain lea leamašan virgeluopmu eai oaččo virgeluopmobálkká, muhto eastadit ođđa vuordinbeivviid ovdal go beaiveruđat máksojuvvojit.

Bargo- ja searvadahttindepartemeanta áigumuš lea ahte goappaš evttohuvvon rievdadusat beaiveruhtaláhkaásahusas čađahuvvojit nu jođánit go vejolaš ja maŋimusat suoidnemánu 1.beaivvi.

 

Eanet máškidis virgeluopmonjuolggadusat: – Dáid rievdadusaiguin šaddá álkit juohkit virgeluomu, juogo ollásit dahje belohahkii, eanet bargiid gaskkas guhkit áigái. Evttohusat mihtet bargoeallima bealálaččaid garra sávaldagaid, dajai  stáhtaministtar Jens Stoltenberg go son odne galledii Eramet AS Saudas. Govven: Eramet.