Son bovde čoahkkimii buohcuvuođajávkamiid birra

Stáhtaministtar Jens Stoltenberg bovde dál bargoeallima oasehasaid sierra čoahkkimii mii galgá gieđahallat doaibmabijuid mat sáhttet geahpedit ollu jávkamiid buohcuvuođa geažil. – Mun vuorjašuvan dan geažil mii dáhpáhuvvá. Sihke oktagasaid ja ekonomalaš doaibmanfriddjavuođa geažil mii fertet gávdnat váikkuhangaskaomiid mat sáhttet geahpedit buohcuvuođa loguid, celkkii Stoltenberg sártnistis LO Stats kartellakonferánssa oasseváldiide Golas.

Bargo- ja čálgodirektoráhta ođđa dieđut orrot čájeheamen ahte oadjoruđa máksin boahcuvuohta juohke bargi nammii sáhttá lassánit 10 proseanttain jagis 2008 jahkái 2009. Stáhtaministtar geavahii ollu iežas sáhkavuorus dán fáttá birra Kartellakonferánsii. 

– Mun vuorjašuvan sihke dainnago jávkamat buohcuvuođa geažil leat hirbmat alla dásis, ja dainnago mii eat leat lihkostuvvan geahpedit dakkár jávkamiid maŋimuš jagiid, nugo ulbmil lei go dagaimet soahpamuša searvadeaddji bargoeallima birra (IA-soahpamuš dárogillii). Dat lea bahás ášši buohccin dieđihuvvon olbmuide ja guđege bargosadjái mii massá máhtu, ja vel oktasaš servodahkii, mii massá dinestusaid ja ferte gillát ođđa goluid, cealká Stoltenberg.

Proseassa mii galggašii oaččuhit áigái ođđa soahpamuša searvadeaddji bargoeallima birra, álgá ođđajagemánu gaskkamuttos. Áigemearri lea njukčamánu 1. b. 2010, ja bargoministtar galgá jođihit ráđđádallamiid.

Statsministtar Stoltenberg doallá sáhkavuoru LO Stats kartellakonferánssas. Govvideaddji: Pål Andreassen/LO Media. Geahča eanet govaid dás:Flickr

– Dál mun dáhtun doallat čoahkkima bargoeallima oasehasaiguin, vai olašeimmet oktasaš duohtadilálaš ipmárdussii jávkamiid birra buohcuvuođa geažil ja daid buktin hástalusaid birra norgalaš ekonomiijii. Dat šaddá veahkkin dáláš prosessii mii lea jođus ođđa ja buoret IA-soahpamuša birra, cealká Stoltenberg.

Bušahttadilli dahká vel erenoamáš dehálažžan midjiide oažžut oadjogoluid lassáneami háldoseamet. 

– Boahttevaš jagiid mii bákkus fertet goahcat almmolaš ruhtageavaheami. Dat váikkuha dan doaibmanfriddjavuhtii mii mis lea dakkár surggiid ovddideapmái go skuvllaid, boarrásiidfuola ja johtalusa. Danne lea erenoamáš bargat ja čađahit beaktilis doaibmabijuid mat geahpedit oadjogoluid sávakeahtes lassáneami, cealká Stoltenberg.

Bargo- ja searvadandepartemeanta áigu ođđa IA-soahpamuša barggu oktavuođas nammadit fágalaš áššedovdiidjoavkku mii galgá árvvoštallat vejolaš hálddahuslaš doaibmabijuid. Lassin departemeanta áigu árvvoštallat dárkileappot ja divaštallat oasehasaiguin barggaheaddjiid ruhtadeami várás buohcciidruhtaortnega iešguđetlágan málliid. Dat čađahuvvo bušeahttaneutralitehta eavttuin.