Árvodáhkádus: Árvvolaš boarrásiidfuolahusa láhkaásahus

- Árvodáhkádus sihkkarastá buori bálvalusfálu boarrásiidda. Láhkaásahus čuovvola boarrásiidsoahpamuša Risttalaš álbmotbellodagain ja Gurutbellodagain. Ovttas nannejuvvon suohkanekonomiijan ja buoriduvvon doarjjaortnegiin buhcciidruovttuide ja fuolahanviesuide, lea dáhkádus dehálaš oassin ráđđehusa barggus buori boarrásiidfuolahusa ovddas, dadjá stáhtaministtar Jens Stoltenberg.

Ráđđehus mearridii odne ođđa láhkaásahusa man vuođđun lea suohkandearvvašvuođabálvalusláhka ja sosiálabálvalusláhka árvvolaš boarrásiidfuolahusa birra (árvodáhkádus).

Eaktun luohttevašvuhtii boarrásiidfuolahusas lea ahte mii dáhkidat bálvalusfálu mas mihttomearrin lea ahte juohkehaš galgá oažžut árvvolaš boarisvuođa ja vejolašvuođa eallin juohkehačča vejolašvuođaid ja vuođđudeaddji dárbbuid mielde, lohká Stoltenberg.

Go árvvolaš boarisvuođa sisdoallu aiddostahttojuvvo ja čilgejuvvo árvodáhkádusa bakte, de boarrásiid rievttálaš dilli čilgejuvvo. Váidin ja gozihaneiseválddiid galget sihkkarastit ahte suohkanat doahttalit árvodáhkádusa. Nu šaddá álkibun juohkehažžii árvvoštallat jovdet go dobbelii váidagiin.

- Láhkaásahus galgá sihkkarastit rivttes vuoruheami ja áŋgiruššama fuolahusbálvalusas, dadjá dearvvašvuođa- ja fuolahusministtar Anne-Grete Strøm-Erichsen.

Láhkaásahus govvida boarrásiidfuolahus árvovuođu, seammás go válddaha doaibmabijuid galgá láhččet bálvalusfálus, nugomat rievttes ja dohkálaš orrundilli, váidudeaddji dikšu ja árvvolaš jápmin, fágalaččat dohkálaš čuovvoleami doaktáriid ja eará heivvolaš bargiid bealis, ságastallamat eksisteanssalaš gažaldagaid birra jnv.

Huksemis boarrásiidfuolahusa lea guhkilmas prošeakta, danin lea ráđđehus šiehtadusa olis bušeahtaárvalusaid bakte  álggahan ollu doaimmaid mat galget nannet suohkanekonomiija oppalaččat ja doaibmabijuid 2015 Fuolahusplánas earenoamážiid. Suohkansuorggi oppalaš dietnasiid lassáneapmi 2007 rájes gitta 2011 rádjai dagahit 2011-ruvdnodási mielde sullii 27,1 mrd. ruvnno ja friddja dietnasiid lassáneapmi seamma áigodagas sullii 12,3 mrd. ruvnno.

Šiehtadusa vuođul gaskal ráđđehusbellodagaid, RáB ja Gurut gaskkas de 2015 Fuolahusplána nannejuvvui oktiibuot 55 milj. ruvnnuin 2009:s. Fuolahusplána nannejuvvui liige 50 milj. ruvnnuin 2010:s. Lassáneapmi lea e.e. geavahuvvon gealbonannejeaddji doaimmaide, fuolahusdutkamii ja kultuvrralaš vázzinsoabbái.

Ovddasguvlui ferte boarrásiidfuolahusa ovdáneapmi deattuhit sisdoalu lassin kapasitehtii. Seamma go earáge geavahanjoavkkut leat boarrásat eahpeovttalaš joavkun mas leat iešguđetge dárbbut ja sávaldagat. Buorre boarrásiidfuolahus mas lea buorre kvalitehta gáibida ahte bálvalus huksejuvvo dakkár árvovuođu nala mii nu bures go vejolaš sihkkarastá juohkehačča iehčanasvuođa ja árvvuid.

Dát mearkkaša priváhta eallima vuoigatvuohta, iešmearridanvuoigatvuođa, vuoigatvuohta oažžut oktagaslaš heivehuvvon bálvalusaid ja vejolašvuohta aktiivvalaččat oassálastit ja vuoigatvuohta oažžut buori bálvalusaid mas lea buorre kvalitehta. Boarrásiidfuolahus mihttomearrin lea sihkkarastit juohkehažžii dorvvolašvuođa ja miellagiddevaš eallima.