Norga ja Ruošša vuolláičálliba šiehtadusa

Šiehtadus Norgga ja Ruošša mearrarájá geassima hárrái ja ovttasbarggu birra Barentsábis ja Buollaábis galgá vuolláičállojuvvot Murmánskkas čakčamánu 15. beaivvi 2010.

Stáhtaministtar Jens Stoltenberg ja presideanta Dmitrij Medvedjev galgaba oasálastit vuolláičállin dilálašvuođas, ja olgoriikkaministtar Jonas Gahr Støre ja Sergej Lavrov galgaba vuolláičállit šiehtadusa.

- Mun lean hui ilus go mii ná johtilit sáhttit vuolláičállit šiehtadusa. Dat lea historjjálaš go mii dál maŋŋil máŋggaid jagiid šiehtadallamiiguin leat ovttaoaivilis Norgga ja Ruošša gaskasaš deháleamos čoavddekeahtes áššis, dadjá stáhtaministtar Jens Stoltenberg.

Šiehtadus galgá čielggadit mearrarájá Norgga ja Ruošša gaskkas Barentsábis ja Buollaábis. Dat sisttisdoallá maid mearrádusaid mo joatkit guolástussuorggi ovttasbarggu ja mo ovttasbargat hálddašit vejolaš petrolearesurssaid mat gártet leat juohkolinnjá guktui beallai. 

Šiehtadus galgá maŋŋil vuolláičállima sáddejuvvot dohkkeheapmái Stuoradiggái ja ruošša dumai. Šiehtadus almmuhuvvo vuolláičáledettiin.

Praktihkalaš dieđut:
Lea mearriduvvon ahte vuolláičállin dilálašvuohta dáhpáhuvvá veaigin (ruošša áigi) Murmánskkas. Eanet dieđut prográmma, áiggi ja báikki birra almmuhuvvojit nu johtilit go dat leat čielggaduvvon ruošša eiseválddiiguin.

Norgalaččat geat háliidit vuolgit Ruššii, fertejit háhkat alcceseaset visuma. Journalisttat geat háliidit oasálastit Murmánskkas, fertejit dan almmuhit Stáhtaministara kantuvrii, smkinfo@smk.dep.no ovdal čakčamánu 8. beaivvi dii. 12.00. Jos ležžet gažaldagat, de sáhttá váldit oktavuođa Stáhtaministara kantuvrrain, tlf. 22 24 40 07.

Dasa lassin ferte visuma ohcat ruošša ambassádas dábálaš vuogi mielde. Listu mas leat buot journalisttaid namat sáddejuvvo ruošša ODii duođašteapmái ja dat lea vuođđun visumjuolludeapmái.