Eanet áŋgiruššan davviguovlluin go goassege ovdal

Davviguovllut leat min deháleamos strategalaš áŋgiruššansuorgi olgoriikapolitihkas. Danne lea ráđđehus systemáhtalaččat nannen áŋgiruššama davviguovlluin maŋimuš jagiid. Dát áŋgiruššan jotkojuvvo.

- Mii árvalit 168 milj. ruvdnosaš lassáneami davviguovloáŋgiruššamii. Oktiibuot áigu ráđđehus geavahit sullii 1,2 miljárdda ruvnnu davviguovlodoaibmabijuide boahtte jagi, cealká stáhtaministtar Jens Stoltenberg.

Fram-guovddáža rahpamis Romssa gávpogis odne almmuhedje stáhtaministtar Jens Stoltenberg, máhttoministtar Kristin Halvorsen ja gieldaministtar Liv Signe Navarsete ráđđehusa davviguovloáŋgiruššama boahtte jagi.

- Eai goassege ovdal leat nu ollu návccat biddjojuvvon davviguovlluide go dan maid dát ráđđehus bidjá. Min politihkka lea viiddis riikkalaš návccaid bidjan ássamii, bargui, árvoháhkamii, dálkkádahkii ja birrasii, ceavzilis hálddašeapmái, máhttui ja kultuvrii, cealká Jens Stoltenberg.

Njukčamánus 2009 almmuhii ráđđehus dokumeantta ”Ođđa huksengeađggit davvin. Ráđđehusa davviguovlostrategiija boahttevaš lávki,” mas čieža áŋgiruššansuorggi definerejuvvojit. Dokumeanta sisttisdoallá gudneáŋgiris ulbmiliid ja doaibmabijuid mat ođđasit háltádit ráđđehusa davviguovloáŋgiruššama boahtte 10-15 jagi. Oktan Davviguovlostrategiijain, mii almmuhuvvui juovlamánu 1. b. 2006, dáinna guovtti dokumeanttin lea ollislaš, oktiiheivehallojuvvon ja guhkesáigásaš davviguovlopolitihkka ulbmilin. Strategiija sisttisdoallá 22 sierranas doaibmabidjočuoggá. Dát doaibmabijut leat dál eanaš čađahuvvon dahje álggahuvvon.

- Davviguovlluin leat áibbas áidnalunddot eavttut ja sierralágan raššivuohta, ja danne mii dárbbašit eambbo dieđuid luonddu ja resurssaid birra. Dutkan ja máhttobuorideapmi leat vuođđu min davviguovloáŋgiruššamis, dadjá máhttoministtar Kristin Halvorsen.

Ráđđehus áigu nannet barggu máŋgga suorggis, ja ii ba unnimisat ge lea áigumus ráhkadit ollislaš bearráigeahččan- ja dieđihanvuogádaga davviguovlluid várás (BarentsWatch),ovddidit minerálavuđot ealáhusdoaimmaid, ovddidit mariidna biospekterema, čuovvolit davviguovloáŋgiruššama birassuorggis, ráhkadit dálkerádara Nuorta-Finnmárkui, ráhkadit ođđa buolladutkanprográmma Norgga dutkanráđđái ja áŋgiruššat máhttoovddidemiin davviguovlluin ja Árktisis.

- Mii áigut buorebut geavahišgoahtit riikkaoasi vejolašvuođaid, dan áidnalunddot luonddu, rikkis resursavuođu ja siidaguoibmevuođa Ruoššain. Ráđđehus áigu leat mielde doarjumin regionála ovddideami vai šaddet bargosajit ja vai ovttasbargu min ránnjáriikkain davvin nanosmuvvá máŋgga suorggis. Go áigumuš lea sihkkarastit ássama ja árvobuvttadeami davvin lea buorre vuođđostruktuvra dehálaš, ja danne áigu ráđđehus čađahit stuorra johtalusvuoruheami mii lea dieđihuvvon Riikkalaš johtalusplána, cealká gieldaministtar Liv Signe Navarsete.