Hålla friddjabessambiejven ja nasjonála veteránbiejve, moarmesmáno 8. biejve 2012

Májestehtalasj Gånågis, Veterána, Soldáhta, Gieres gájka!

Moarmesmáno 8. biejvve beras luluj agev liehket mihás biejvve ietjama rijkatja histåvrån.

Symbåvllå friddjavuohtaj. Friddja álmmuk. Rabás demokratija.

Jagen 1945 vijmak ráfe Europáj máhtsaj. Gudájahkásasj sjievnnjet gádoj. Dádjadahtes gierddama hiejteduvvin.

Ietjama rijkka lej ládaduvvam. Vuonarijkaga sæbrrin dårruj sijdan ja aj ålggon. Doaros vaháguvvama lidjin moattes. Álkke lij hådjånit. Vuorbbe gå miján lij gånågis Haakon VII ja kråvnnåprinssa Olav. Symbåvlå álmmuga miellaj ja soldátaj jálosvuohtaj.

Akta dajs guhti le oassálasstám dalutjis gå doarro álgij jagen 1940 le Gunnar Sønsteby.

Sønsteby værrodij ietjas demokratijaj.

Doaroájgen mielajn friddjavuodas mij rájájt smållij. Doaro maŋŋela miella såbadibmáj mij vájmojt lieggij.

Sån le vuostasj Vuonarijkak guoddemin Suodjalusá Guddnekruossav, majt áttjak oattjoj. Doarrokruossav gålmåjn svierdijn le guoddám 1946 jage rájes. 

Moadda buolva li gullam Gunnar Sønstebya jasska ja mihás subttsasav. Ulmutjaárvo ja jálosvuoda birra. Man divras friddjavuohta le.

Vuosstetjuodtjo le nålåjt tsieggim ma agev tjuovggi ja vuosedi gæjnov ráfe vuosstij. 

Gijttup ja hievedup Gunnar Sønstebyav uddni.

Mijá vuorrasamos veterána dårrun nuppát væráltdoaron. Mijá nuoramus veterána duostudin diededum ulmusjmuorrodimev Libyan dijmmá.

Uddni tjuodtjobihtit dánna guorralakkoj. Guovte ájggegávdas. Guovtemuoduk doarroværjo. Valla sæmmi låssis dahkamus.

Dij lihpit åskåldisát gånågisáv, álmmugav ja ájtteklándav dievnastam. Dij lihpit friddjavuodav ja ráfev sádjum. Nav le veteranaj avtaraják ja gudnálasj histåvrrå. 

Uddni tjåhkanip Oslon ja ålles rijkan.

Tjåhkanip gijttevasjvuodav vuosedittjat. Didjij veteránajda, dijá fámiljajda ja divna lagámusájda.

Sæmmi bále vuosedip ahte aktijvuodav moarmesmáno 8. biejves 1945 ep vajálduhte. Veterána, sebrudakviesáda, álmmukválljidum ájrrasa ja ráddidus: Mij aktidip gå Májestehtalasj Gånågis giedjegijt biedjá Nasjonálmonumenntaj dánna Akershus lanen.

Værált rievddá. Suodjalusá dahkamusá aj rievddi.

Huoman juoga ij rievddaduvá: Mijá aktisasj visjåvnnå jaskadap værálda birra.

Dåssju buorep orgániseridum værált máhttá nannit ráfev mij bissu.

Danen vuonarijka soldáta oassálasstin Tysklánda sebrudagáv bajedit gå nuppát væráltdoarro någåj.

Danen moattes dijás lihpit dievnnum AN-jådeduvvam operásjåvnåj. Ja danen lip mij Afghanistanan.

Mij lip danna gåhtjodusá diehti væráltsebrudagás. Mijá soldáhta li javllam sihti sæbrrat, vájku le persåvnålasj vádá buorep iellemav iehtjádijda åttjudit.

Dakkir lágásj alvos dahkamus ij vargga gávnnu

Mijá soldátaj bargo duogen le snivva gárvedime.

Aj muhtem várálasj hárjjidallama.

Snjuktjamáno 15. biejve dán jage jábmin vihtta soldáta hárjjidallama vuolen. Suodjalus láhpij vihtta ájnas ambassadøra.

Mujttalip sijáv árvujn ja gijttevasjvuodajn.

Mujttalip uddni sijáv gudi li jábmám madin Vuonarijkav dievnastin. Operasjåvnåj aktijvuodan ålggorijkan, jali hárjjidallamij aktijvuodan dáppe sijdan.

Sij li vaddám gájk ájnnasabmusav: Ietjasa iellemav.

Usjudallap aj sijáv gudi li vahágahteduvvam guhkesájggáj.

Usjudallap dijáv gudi juohkka ijá rahtjabihtit låssis ájádusáj ja niegoj. Dij ánssidihpit suodjaluvvat gå dahkamusáv ållidihpit. Mij gudi jasska sijddaj bátsijma galggap dav åvdåsvásstádusáv válldet.

Mijá åvdåsvásstádus le aj tjalmostit veteránaj ratjástimev. Vaj oadtjobihtit dav vieledimev majt ánssidihpit.

Berustit le aj rámmpodit. Uddni rámmpop dijájt veteránajt.

Soldáhtta le guddnenammadus. Veterádna le guddnenammadus.

Dij sádjobihtit jasska boahtteájgev ietjama mánájda. Dan åvdås dijáv uddni gijttep.

Snjilltjamáno 22. biejve dijmmá mujteduvájma man rassje jasskavuohta duodalattjat le.

Dan vierredago suojvanisás tjuodtján udnásj oajvvesáhka:

Friddjavuohta ja demokrátija åvdås vierttip barggat.

Vierttip juohkka biejve suodjalit ietjama aktisasj árvojt.

Gijtto gå gulldali!