Sárdni kránsabidjamis

Majestehtat,
Gonagaslaš Allavuođat,
Ráhkis buohkat,

Diimmuin ja beivviin maŋŋel suoidnemánu 22.b. leimmet mii čoahkkanan našuvdna.
Ovttastahttojuvvon –
Álggos šohkas ja heađis.
dasto nannosit bealušteame olmmošvuođa ja máŋggabealátvuođa–
Min rabas, luohtehahtti searvevuođa.

Jagi maŋŋel čoahkkanit dan vissisvuođas ahte mii máhttit go mii fertet.

Rihkolaš gottii máŋgasa.
Dagahii ipmirmeahttun gillámušaid.

Bomba ja skuohtat galge rievdadit Norgga.
Norgga álbmot vástidii salasteame min árvvuid.

Rihkolaš ii lihkostuvvan.
Álbmot vuittii.

#

Odne muittašit dan 77 geat gottáhalle.
Gávccis sis dáppe ráđđehuskvartálas.

Sii geat jápme suoidnemánu 22.b. eai ohcalan makkárge várálašvuođaid.
Guhkkin eret.
Sii elle numot mii háliidit eallit Norggas.
Muhtumat vázze muhtun gáhtas.
Earát ledje barggus.
Ollugat serve nuoraidleirii.

Jápmin bođii fáhkka ja árpmuhemiid.

Jagi leat mánát vázzán dan lossa geainnu hávddi lusa moraštit iežas eatni dahje áhči.
Áhčit ja eatnit leat ganjaldan iežas ráhkis bátni dahje nieidda guoros seaŋgga bálddas.
Ja duháhiid earát– oappát/vieljat, áhkut/ádját, olbmát ja bargoustibat – leat dovdan ohcaleami ja morraša.

Duohtavuođas lea leamašan lossa jahki.

#

Ii leat leamaš oktage beaivi nu ahte almmolašvuođas ii leat ságastallojuvvon dán surgadis dáhpáhusa birra.

Earenoamážit dan birra mii doaimmai ja mii manai boastut.
Lea áibbas dárbbašlaš ja dehálaš digaštallan.
Oahppan dihte.
Hehttet ahte dat fas dáhpáhuvvá.

#

Odne galgat muittuhit nubbi nubbái ahte ráhkisvuohta lea agálaš:

Eallima dolla lea jáddan.
Ja bákčasa fertebehtet álohii guoddit.
Muhto liegga muittuid ii sáhte dis oktage váldit eret.

Áhči oadjebas giehta.
Jienat mánáidlanjas.

Buorrevuođa ja ilu ii sáhte sihkkut eret.

Suoidnemánu 22.b galgá boahtteáiggis álohii gullat sidjiide geat masse heakka.
Mii galgat giitevašvuođas muittašit daid geat mis jápme.

Ja mii galgat doarjjan didjiide geat roasmmohuvaidet.
Dii geat guoddibehtet oinnolaš ja oaidnemeahttun háviid.

#

Mii eat leat vajálduhttán lohpádusa maid attiimet measta jagi áigge nubbi nubbái.
Smávva ja stuora searvevuođain galgat oaidnit din geat rahčabehtet.
Geat rahčabehtet hálddašit árgabeaivvi.
Geat ain moraštehpet.

Mii eat galgga vajálduhttit din go čuovgga sadjái seavdnjat boahtá čakčat.
Sáhttá leat ránná, bargoustit dahje skuvlaviellja/skuvlaoabbá.
Skoalkal uksii.
Atte álddát.

Árgabeaivválaš ságastallan sáhttá leat geaidnun fas ruovttoluotta eallinmoktii.

#

Vássán jahki lea midjiide oahpahan man mávssolaš eallin lea.
Ja man rašši eallinsuotna lea.
Fáhkkestaga dat lea boatkanan.
Dalle lea visot beare maŋŋit.

Galgá leat giitevaš juohke buori bottu ovddas maid mii oažžut.

Mátkkiid maid mii čađahit.
Borramiid maid mii juogadit.
Ságastallamiid ja jaskesvuođa.

#

Divtte dan leat lohpádussan maid mii odne juogadit:

Ilolašvuođain eallima ovddas mii gudnejahttit sin geat leat jápmán.