Háliida joatkit doarjaga Bosnia-Hercegovinai

Suodjalusministtar Grete Faremo ja su kollega, bosnialaš suodjalusministtar Selmo Cikotic, digaštalaiga sihke NATO ja sudno guovtti riikkaska viidásat ovttasbarggu go Cikotic galledii Norgga.

Fotografiija: Torgeir Haugaard, Suodjalusa mediaguovddáš

Maŋimus jagi lea Norga lasihan iežas doarjaga Bosnia-Hercegovinai, erenoamážit dannego Norggas lea jagiid 2009 ja 2010 NATO oktavuođaambasádadoaibma Bosnia-Hercegovinas. Norga lea atnán dehálažžan maiddái addit doarjaga bosnialaš suodjalusa ođastussii.
- Mii dáhttut joatkit buori ovttasbarggu, ja háliidit geahčadit mo dát guovtti riikka sáhttet atnit ávkki goabbát guoimmi resurssain ja gelbbolašvuođas, cealká Grete Faremo.

Veahkeha Bosnia-Hercegovina
Norggas lea dál uhca logoš stábaoffisearat Bosnia-Hercegovinas. Dán guovtti riikka Suodjalusdepartemeanttat barget ovttasráđiid muhtun ráddjejuvvon guovdilis surggiin main Norga sáhttá veahkehit bosnialaš suodjalusa ođasteamis. Norga áigu earret eará veahkehit suodjalusguorahallamiin, prošeavttain mii lea militeara bargiid ođđasisoahpaheami várás, ja doarjagiin Peace Support Operations Training Centre nammasaš guovddážii mii lea Sarajevos.

Fotografiija: Torgeir Haugaard, Suodjalusa mediaguovddáš

Háliida šaddat NATO-miellahttun
Bosnia-Hercegovinas lea viiddis politihkalaš ovttamielalašvuohta das ahte riika galgá šaddat NATO-miellahttun farggamus lági mielde. Jagi 2009 ozai Bosnia-Hercegovina beassat NATO MAP-riikan, mii mearkkaša oažžut doaibmaplána NATO-miellahttovuhtii. Prográmma biddjojuvvo doibmii go suodjalusopmodagat registarastojuvvojit stáhtaopmodahkan.

- NATO viiddideapmi lea eahpitkeahttá lihkostuvvan, ja lea erenoamáš dehálaš go áigumuš lea oaččohit áigái dássitvuođa NATO lahkaguovlluin. Lihttoriikkat leat ovttaoaivilis ahte Oarje-Bálkana riikkat lunddolaččat gullet NATOi. Bosnias lea ain ollu ráhkkaneamuš ovdalgo sáhttá beassat NATO-miellahttun, muhto MAP-proseassa lea ávkkálaš reaidu čađahit dárbbašlaš ođastusaid, dadjá Faremo.

Suodjalusministtar Grete Faremo ja Bosnia-Hercegovina suodjalusministtar Selmo Cikovic dárkkisteaba gudnesoalddátveaga. - Fotografiija: Torgeir Haugaard, Suodjalusa mediaguovddáš

Suodjalusministara guovttos ságastalaiga maiddái politihkalaš dili birra Oarje-Bálkanis ja riikkaidgaskasaš soahtedoaimmaid birra.