Háliidit viiddis ovttasbarggu davvin

-Doalahan dihtii doaibmi suodjalusa mii fertet bargat bures ovttasráđiid iežamet biras riikkaiguin, cealká suodjalusministtar Grete Faremo maŋŋá viiddiduvvon davviriikkalaš-báltalaš suodjalusministtarčoahkkima, mii lágiduvvui skábmamánu 9. ja 10. beivviid.

 
Oktanuppelogi riikkas ledje ovddasteaddjit viiddiduvvon davviriikkalaš-báltalaš suodjalusministtarčoahkkimis Oslos. Gurut bealde olgeš guvlui: Jaak Aaviksoo Estteeatnamis, Christian Schmidt Duiskkas, Rasa Jukneviciene Lietuvas, Gitte Lillelund Danmárkkus, Sigridur Duna Kristmundsdottir Islánddas, Grete Faremo, Liam Fox Stuorrabritánnias, Zbignew Wlosowicz Buolas, Sten Tolgfors Ruoŧas, Jyri Hkmies Suomas ja Artis Pabriks Látvias. Govvideaddji: Stian Solum, Suodjalusa mediaguovddáš.

Hástalusat davvin
Oslo-čoahkkimis digaštalle riikkat earret eará NATO ođđa strategiija, mas stuorát deaddu biddjojuvvo lagašguovlluid suodjaleapmái. De hálle maiddái das mo sii sáhttet bargat buorebut lahkalagaid dorvvolašvuođapolitihkalaš hástalusaid hárrái davvin.

-Mu mielas mii galggašeimmet bargat buorebut lahkalagaid ovttasráđiid earret eará návccalašvuođa, oahpahusa ja hárjeheami/hárjehallama olis. Norga váldá áinnasge vuostá eanet lihtolaččaid hárjehallat mii gáibideaddji eanadahkii, cealká suodjalusministtar.

Čoahkkimis Faremo deattuhii erenoamážit hástalusaid davviguovlluin, main jieŋaid suddama geažil sáhttet šaddat eanet gávppálaš doaimmat ja mat danne gáibidit eanet soahteveagalaš lahkaleahkámuša, erenoamážit ohcan- ja gádjundoaimmaide. Son deattuhii dan ge man dehálaš lea ain eambbo ovddidit buriid gaskavuođaid Ruššii.

Gánnáhahtti ovttasbargu
Davviriikkat leat jo formálan dahkan dán ovttasbarggu NORDEFCO bokte.                                                     
-Mii leat juksan buriid bohtosiid, earret eará oktasaš fievrrádus- ja logistihkkačovdosiiguin iežamet soalddáhiid várás Afghanistánas. Dan lassin mis leat prošeavttat jođus mat gullet oahpahussii, hárjehallamii ja neavvoovttasbargui, dadjá Faremo.

Davviriikkat digaštalle earret eará mo mii sáhttit čađahit ON-resolušuvnna 1325 nissoniid, ráfi ja sihkkarvuođa birra, fállat vejolaš oktasaš oasseveahki ON-doaimmaide ja oaččohit áigái davviriikkaid soalddátveagaid lagat ovttasbarggu Afghanistánas.

-Mii fertet ain ovddosguvlui bargat ovttasráđiid ON-, NATO- ja EU-doaimmain, dadjá Faremo.

Suodjalusministtar Grete Faremo jođihii čoahkkima. Govvideaddji: Stian Solum, Suodjalusa mediaguovddáš.

Suodjalusministtar Grete Faremo ja su brihttalaš  kollega, Liam Fox.

Eanet govaid gávnnat Suodjalusa mediaguovddáža fotoarkiivvas dán čujuhusas: htt://mediearkiv.forsvaret.no/fotoweb/