Giitá soalddáhiid barggu ovddas Faryabas

Dál lea maŋemus norgga soalddát guođđán Faryab provinssa Afganistanas. Suodjalusministtar Anne-Grete Strøm-Erichsen rámida sin barggu.

- Norgga soalddáhat lea dahkan hirbmat buori barggu hui gáibidahkes doaimmas. Hirbmat olu giitu sidjiide dan ovddas, dadjá son.

Suodjalusministtar deattuha ahte soalddáhiid deháleamos bargu lea leamašan oahpahit afganalaš veagaid.

- Norgga soalddáhat leat oahpahan ja bagadallan afganalaš soalddátustibiid, ja bargu lea buktán bohtosiid. Dál afganerat ieža dadjet sii leat gergosat badjelasas váldit sihkarvuođa ovddasvástádusa Faryabas. Dát lea dehálaš mearkabeaivi, dadjá Anne-Grete Strøm-Erichsen.

Suodjalusministtar atná hirbmat árvvus soalddáhiid ja dan barggu maid sii leat dahkan.

- Dákkár earenoamáš beaivvi jurddašan maiddái soalddáhiid birra maid mii massiimet, ja sin birra geat roasmmohuvve. Ollugat leat oaffaruššan ollu. Soalddáhat leat miehtan oalle stuora persovnnalaš riskii go earáid ovddas leat bargan. Dainna lean vuovdnái, ja sii sáhttet dainna leat vuodnát. Mun háliidan maiddái giitit soalddáhiid bearrašiid doarjaga ovddas maid sii leat addán, dadjá son.

Norga ain boahtá searvat ISAF- vehkii Afganistanas. Norgga soalddáhat ain jotket oahpaheame afganalaš spesiálajoavkkuid Kabulas, ja okta norgga fievrredangirdi boahtá leat riikkas mánuin ovddasguvlui. 2013:s norgga soalddáhat oahpahit afganalaš politiijaolbmuid Mazar-e Sharifas.