Stáđis ja vuollegis bargguhisvuohta Norggas

Ráđđehus vuordá ahte bargomárkana dilli bissu oalle stáđisin ovddasguvlui. Dilli Norgga earrána nu buori ládje eará Eurohpá riikkain gos ain lea alla bargguhisvuohta maŋŋil finánsaroasu.

– Barggahus lea lassánan 30 000 olbmuin maŋimus beannot jagis, ja Ráđđehus atná vuođđun ahte ahtanuššan ain joatkašuvvá. Bargoveahka maiddái lassána, masa alla sisafárren lea duogáš. Dán jagis vurdo bargguhisvuohta unnán rievdat, dadjá bargoministtar Hanne Bjurstrøm. 

71 200 barggahusdoaimma jagi 2012:s
Áigumuš lea bisuhit barggahusdoaimmaid seamma dásis go odne. Barggahussajiin adnojit sullii 17 000 saji bargguhis olbmuide ja sullii 54 200 saji bargonávccahis olbmuide. Barggahusdássi bargonávccahis olbmuide lea lasihuvvon sullii 1 000 sajiin vai fálaldat dán jovkui lasihuvvo. Barggahusdássi bargguhis olbmuide lea njiedjan sullii 1 250 sajiiguin 2011 plánaloguid ektui. Barggahusdási njiedjan bargguhisolbmuide lea boahtán danin go bargomárkan lea buorránan. 500 barggahussaji leat čadnon Ráđđehusa bargostrategiijai bargonávccahis olbmuid várás (geahča sierra preassadieđáhusa).

Ráđđehus deattuha ahte ruđat barggahusdoaimmaide galget beaktileamos lági mielde adnot. Ráđđehus árvala danin rievdadit máksingeavada suddjejuvvon suorggis bargohárjehallamii, čielggadeapmái ja bistevaš láhččojuvvon bargui 2012 suoidnemánu 1. beaivvi rájes. Odne dákkár barggahusdoaibmasajit diŋgojuvvojit guhtta mánu ovdal go váldojit adnui, ja máksojit go doaibma váldo atnui. Geavatlaččat dát mearkkaša ahte máksojuvvo anekeahtes sajiid ovddas. Ráđđehus árvala ahte barggahusdoaibmasajit ovddas baicca galgá máksit maŋŋil go doaibma lea čađahuvvon.
 
Beaiveruđat permitterema oktavuođas
Olbmot geat manahit bargodietnasa bargguhisvuođa dihte leat beaiveruhtaortnega bakte sihkkarastojuvvon govttolaš dienasdási vai sáhttet fuolahit iežaset birgemuša. Vai dagaha álkibun barggaheddjiide doalahit gelbbolaš bargiid dakkár áigodagas go lea unnán doaibma ja fuonesáigi de leat beaiveruđaid- ja permitterennjuolggadusat viiddiduvvon máŋgga surggiin 2009 vuosttaš jahkebealis.

Buorránan dilli olis bargomárkanis de ii leat šat dárbbašlaš doalahit beaiveruđaid- ja permitterennjuolggadusaid viiddideami. Ráđđehus árvala danin máhcahit njuolggadusrievdadeami 2012 ođđajagimánu 1.beaivvi rájes. Dát mearkkaša ahte barggaheaddji áigodat guhkiduvvo viđa beaivvis logi beaivái go lea unnimus 40 proseanta geat leat permitterejuvvon, dievas áigodat man ovddas oažžu beaiveruđaid go lea permitterejuvvon oaniduvvo 52 vahkus 30 vahkkui go leat ođđa dáhpáhusat, seammás go barggaheaddji bálkágeatnegasvuođa spiehkastat seamma dáhpáhusain oaniduvvo 30 vahkkui. Gáibádus barggoáigemeari geahpideapmi ektui jus galgá oažžut beaiveruđaid permitterema oktavuođas lasihuvvo 40 proseanttas 50 prosentii. Go bargomárkana dilli rievdá de permitterennjuolggadusat ođđasit árvvoštallojuvvojit.

Ollugat ovttastahttet barggu ja permišuvnna
Okta penšuvdnaođastusa váldoulbmiliin lea váikkuhit ahte eanet válljejit guhkit bargat. Ođđa penšuvdnavuogádat láhče vejolašvuođa nu ahte veahážiid mielde ja iežas sávaldagaid ja dárbbuid vuođul sáhttá luohpat bargoeallimis.

Ollugat orrot háliideamen ovttastahttit barggu ja penšuvnna. 2011 ovdáneapmi čájeha ahte oallugat leat válljen dakkár čovdosa. Sis geat oažžugohte penšuvnna 2011 ođđajagimánu rájes ledje guđas juohke logádis 2011 geassemánu ain bargodilis.

Vaikko ollugat 2011 leat vuostáiváldán máškidis ealáhatruđa, de boarráset gearddi gaskkas ii leat fidnodoaibma njiedjan. Baicca bargiid/barggaheddjiidlogahaga logut čájehit ahte fidnodoaibma lassána buot joavkkuin geat leat boarráset go 60 jagi.