Davviriikkaid sámekonvenšuvnna evttohus geigejuvvo davviriikkaid sámeministariidda ja sámediggepresideanttaide sin čoahkkimis Helssegis skábmamánu 16. beaivvi. Evttohusa lea ráhkadan ekspeartajoavku man sámeministarat ja sámediggepresideanttat nammadedje 2002:s, ja dan geige joavkku jođiheaddji, Alimusrievtti ovdalaš justitiárius Carsten Smith.

Ekspeartajoavkkus leat leamaš guokte lahtu guđe nai riikkas maid ráđđehusat leat nammadan ja juohke sámediggi lea nammadan ovtta lahtu.

Davviriikkalaš sámekonferánsa 1986:s sávai davviriikkalaš sámekonvenšuvnna ráhkaduvvot. Eiseválddiit ovddidedje ášši sámeáššiid ministariid čoahkkimis Davviriikkaid Ráđi čoahkkima oktavuođas Reykjavikas guovvamánu 28. beaivvi 1995.

– Ahte dál lea gárvvistuvvon davviriikkaid sámekonvenšuvnna evttohus lea historjjálaš dáhpáhus davviriikkaid sámepolitihkas, ja sámeministariid ja sámediggepresideanttaid davviriikkalaš ovttasbarggus, lohká bargo- ja sosiálministtar Bjarne Håkon Hanssen.

– Lea illudahtti go ná guhkás leat ollen. Ekspeartajoavku ánssáša rámi iežas barggu ovddas, man boađus dál lea sámekonvenšuvnna evttohus.

Suoma justiisaministar Leene Luhtanen lea Helssetčoahkkima fuolaheaddji. Go evttohus lea geigejuvvon, de mearridit ministarat ja presideanttat movt sámekonvenšuvnna evttohusain bargojuvvo viidáseappot.

Čuovvovaččat oassálastet Helssetčoahkkimis:

Suomas: Justiisaministar Leena Luhtanen ja sámediggepresideanta Pekka Aikio.
Ruoŧas: Eanandoalloministar Ann-Christin Nykvist ja sámediggepresideanta Lars Anders Baer.
Norggas: Bargo- ja sosiálministar Bjarne Håkon Hanssen ja sámediggepresideanta Aili Keskitalo.
Geigejupmi lea dáppe: Auditoriet, Høgbergsgatan 37, Helsingfors