Juolludeamit sámi doaimmaide
Historjjálaš arkiiva
Almmustahttináigodat Regjeringen Stoltenberg II
Almmustahtti: Bargo- ja searvadahttindepartemeanta
Preassadieđáhus | Almmustahtton: 06.10.2006 | Maŋimuš ođasmahttojuvvon: 11.11.2006
Ráđđehusa stáhtabušeahttaevttohusas lea várrejuvvon 690 mill. ruvnno earenomáš sámi áigumušaide, dan ektui go 2006:s lei 641 mill ruvnno. Sámediggi galgá bušeahttaevttohusa mielde hálddašit sullii 275 mill sámi áigumušaide 2007:s.
Pressedieđáhus
Nr.: 117/10
Dato: 06.10.2006
Juolludeamit sámi doaimmaide
Ráđđehusa stáhtabušeahttaevttohusas lea várrejuvvon 690 mill. ruvnno earenomáš sámi áigumušaide, dan ektui go 2006:s lei 641 mill ruvnno. Sámediggi galgá bušeahttaevttohusa mielde hálddašit sullii 275 mill sámi áigumušaide 2007:s.
Bargo- ja searvadahttindepartemeantta bušeahtas evttohuvvo 2007:s lasihit juolludemiid Sámediggái 11 mill ruvnnuin, 164 mill rádjai 2007:s. Juolludusevttohusas sámediggái lea 5 mill. ruvnno lasáhus dan geažil go sámegiela hálddašanguovlu lea viiddiduvvon Divttasvuona gielddain Nordlánddas.
– Nannen dihtii riikkaidgaskasaš ovttasbarggu boazodoalu hárrái lea ásahuvvon riikkaidgaskasaš boazodoallofága- ja gaskkustanguovddáš Guovdageidnui. Sihkkarastin dihtii bistevaš doaimma, evttoha Ráđđehus lasihit juolludeami guovddážii 1,8 mill. ruvnnuin, dadjá bargo- ja searvadahttinministtar Bjarne Håkon Hanssen.
Dát ráđđehus lea addán Sámediggái buoret vejolašvuođa jođihit doaibmi kulturpolitihka. Kultur- ja girkodepartemeantta bušeahtas evttohuvvo várret 47 mill. ruvnno sámi kulturáigumušaide 2007:s. Juolludeamit sámi áigumušaide leat de lasihuvvon 15 mill. ruvnnuin guovtti jagis.
Sihkkarastin dihtii ruđa Nuortasámi museai ja joatkit čájáhusaid ráhkkanemiiguin 2007, evttohuvvo várret 20 mill ruvnno Kultur- ja Girkodepartemeantta bušeahtas. Evttohuvvo 1,5 mill. ruvnno 2007:s plánet divodemiid ja ođđa lanjaid Ája Sámi Guovddážii.
Evttohuvvo 56 mill ruvnno Sámi allaskuvlii 2007 stáhtabušeahtas. Dás lea 15,7 mill. ruvnno biergasiidda Sámi dieđavistái dan oassái maid Máhttodepartemeantta vuollásaš doaimmat galget atnit, ja 8 mill. ruvnno go leat buorit bohtosat universitehta ja allaskuvllaid ruhtadanvuogádaga boađusvuođđuduvvon osiin.
Ráđđehus evttoha bušeahtas ahte doarjja prošeaktaovttasbargguide davvi Ruoššain ja árktalaš ovttasbargui lasihuvvo oktiibuot 10 mill ruvnnuin. Goappašiid prográmmaide gullet doarjagat iešguđet eamiálbmotprošeavttaide. Ráđđehus deattuha joatkit eamiálbmotdoaimmaiguin sihke Barentsovttasbarggus ja Árktalaš ráđis.
Dasa lassin lea várrejuvvon ruhta ásahit finnmárkokommišuvnna ja meahcceduopmostuolu Finnmárkui. Evttohuvvo várret 10 mill ruvnno dán áigumuššii Justiisa- ja politiijadepartemeantta bušeahtas 2007:s.
Juolludeamit sámi doaimmaide:
| (1 000 ru) | ||||
| Rehketdoallu 2005 | Salderejuvvon bušeahtta 2006 | Evttohus 2007 | Pst. nuppástus 2006-2007 | |
| Olgoriikadepartemeanta | 2 150 | 2 550 | 2 550 | 0,0 |
| Máhttodepartemeanta | 203 749 | 208 814 | 234 654 | 12,37 |
| Justiisa- ja politiijadepartemeanta | 5 393 | 4 740 | * | |
| Kultur- ja girkodepartemeanta | 50 970 | 58 862 | 84 582 | 43,7 |
| Gielda- ja guovlodepartemeanta | 148 479 | |||
| Bargo- ja searvadahttindepartemeanta | 167 613 | 174 100 | 3,9 | |
| Dearvvasvuođa- ja fuolahusdepartemeanta | 29 000 | 36 000 | 37 300 | 3,6 |
| Mánáid- ja dásseárvodepartemeanta | 11 080 | |||
| Eanandoallo- ja biebmodepartemeanta | 148 715 | 146 062 | 149 927 | 2,6 |
| Ođasmahttindepartemeanta | 10 000** | |||
| Birasgáhttendepartemeanta | 2 000 | 2 000 | 2 000 | 0,0 |
| Ollislaš juolludeapmi | 601 536 | 636 641 | 685 113 | 7,6 |
| Sámeálbmot foanda | 4 664 | 4 650 | 4 700 | 1,1 |
| Submi | 606 200 | 641 291 | 689 813 | 7,6 |
*> Ollislaš juolludeapmi sámi áigumušaide ii leat mearriduvvon. Juolludeapmi Sámi vuoigatvuođalávdegoddái mearriduvvo ođđajagimánu 2007 gaskkamuttus.
**> Álgojuolludeapmi ođđa dieđavistái Guovdageainnus.