Ođđasiin odne lea NRK Romsa ja Finnmárku vikkahan av ahte stáhtačálli Berit Oskal Eira lea “mieđihan” ahte ráđđehus ii leat muitalan visot dieđuid Sámediggái Eanandoallo- ja biebmodepartemeantta ja Sámedikki gaskasaš ráđđádallamiin boazodoallolága revišuvnnas. Čuoččuhus ahte dieđut eai leat muitaluvvon eai doala deaivása. Sámediggi lea beassan oaidnit daid dieđuid mat leat fidnemis.

– Dán áššis leat leamaš buorit ráđđádallamat, iige leat goassige čađahuvvon láhkaproseassa departemeantavuogágas dákkár rabasvuođain Sámedikki ektui go boazodoallolágas, cealká stáhtačálli Eira. – Sámediggi leat datte gáibidan oažžut visot láhkaproposišuvnna, dahje visot mearkkašumiid buot paragráfaide. Dát leat dokumeanttat mat eai leat vel ráhkaduvvon, iige danne leat sáhka doallamin dieđuid dušše min hálddus.

– Sámediggi lea ožžon ollislaš láhkateakstaevttohusa, ja notáhta mii čielggada láhkateavstta ovttaskasparagráfaid ektui nu go Sámediggi lea bivdán. Sámediggi lea velá beassan bivdit eanet čilgejeaddji notáhtaid dakkár čuoggáin mat ležžet eahpečielgasat. Sámediggi lea ožžon visot dokumeanttaid maid Eanandoallo- ja biebmodepartemeanta lei lohpidan.

Dasto lea NRK bájuheapmi stáhta ja Sámedikki gaskasaš šiehtadusa ráđđádallanprosedyraid birra veaháš eahpedárkil. Šiehtadusa dán guoskevaš čuoggás, dieđuid birra, daddjo: “Stáhtalaš eiseválddit galget visot dieđihit [...] guoskevaš dilálašvuođain ášši meannudeami buot dásiin.” Dán šiehtadančuoggá lea stáhta ollásit deavdán boazodoallolága meannudettiin.