Bargamušat mat čatnasit Luonddu- ja boazodoallobálvalusaid resursaguovddážii, sirdojuvvojit NAVii

 

Ráđđehus evttoha 2007 salderejuvvon bušeahtas ahte dat bargamušat mat čatnasit Luonddu- ja boazodoallobálvalusaid resursaguovddážii, sirdojuvvojit Bargo- ja čálgoetáhtii.

– Easkka Guovdageidnui ásahuvvon NAV-kontuvrra doaimmaid oassi lea veahkehit daid olbmuid geat heitet boazodoalus ja álget eará bálkáhuvvon bargui. NAV-Guovdageaidnu diehtá mu mielas eanemusat Sis-Finnmárkku bargomárkana birra. Kontuvrras lea gelbbolašvuohta gielas, kultuvrras ja ealáhuseallimis mii lea mearrideaddji dehálaš go etáhta galgá veahkehit boazodoalus heaiti olbmuid. Ulbmil ferte leat gávdnat sidjiide eará dienasbarggu mas boazodoalli áidnolaš máhttu lea ávkkálaš, dadjá stáhtačálli Raimo Valle.  

Iežas ovttasbargoguimmiiguin ja gelbbolašvuođain bargomárkana birra ja barggu háhkki doaibmabijuid birra leat Bargo- ja čálgoetáhtas buorit vejolašvuođat gávdnat heivvolaš čovdosiid boazodoalliide geat heitet bargamis boazodoalus.