Ođđa sámi ofelaččat

Golbma ođđa sámi ofelačča oahpásmahttojuvvojedje odne Riđđu Riđđu festiválas. Sii leat njealját ofelašgázzi geat deaivvadettiinneaset eará nuoraiguin, galget ovddidit áddejumi ja beroštumi sápmelašvuođas. 

Ođđa ofelaččat leat May-Synnøve Trosten (19) Deanus, Berit Kristine Andersen Guvsám (20) Steinkjeras ja Brita Iren Thomasson (21) Limingenis. Stáhtačálli Berit Oskal Eira ja Sámi allaskuvlla rektor Mai Britt Utsi sávaiga ofelaččaide lihku. 

– Sámi ofelaččat dahket mávssolaš barggu go sii juhket dieđuid sámi kultuvrra, identitehta ja servodatdiliid birra Norgga nuoraide. Sin rahčan váikkuha dasa ahte sámi diliid áddejupmi ja beroštupmi sápmelašvuođas lassána, dadjá Berit Oskal Eira.

Golmma ofelačča bargamušat leat juohkit dieđuid ja dan láhkai rievdadit guottuid sámekultuvrii. Dan sii galget dahkat jođidettiin joatkkaskuvllaide miehtá riikka ja juohkit dieđuid sámi kultuvrra, historjjá ja servodatdilálašvuođaid birra. Muhto ovdalgo sii johtigohtet, de fertejit sii čađahit kurssa ”Sámi kultuvrra ja servodaga gaskkusteapmi” Sámi allaskuvllas. Dát kursa lea rabas eará studeanttaide ge.

     
May-Synnøve Trosten, Berit Kristine Andersen Guvsám og Brita Iren Thomasson.

Departemeanta ásahii ofelašortnega 2004 ja Sámi allaskuvla jođiha dan. Allaskuvla oaivvilda ahte golbma válljejuvvon ofelačča šaddet doaibmat dynámalaš ja hutkás joavkun mii váikkuha ollu prošeavtta ováneapmái. Evttohasaid válljedettiin deattuhuvvojedje sin persovnnalaš iešvuođat, dieđut ja máhttu, gaskkustanattáldagat, hutkáivuohta ja indu.

May-Synnøve Trosten lea šaddan bajás davvisámi gilis Árbánatjogas Deanus. Son lea maŋimus jagi leamaš mielde ásaheamen ođđa sámi mánáidgárddi ruovttugildii. Berit Kristine Andersen Guvsámis leat julevsámi ruohttasat Divttasvuonas. Son lea dássážii válljen ovdánit  dáiddalaččat oahpu váldidettiinis. Brita Iren Thomasson lea åarjelsámi nieida gieas lea gullevašvuohta Nuorta-Namdála boazoorohahkii. Son lea aiddo geargan duodjelinnjás Sámij Åhpadusguovdátjis Johkamohkis.

Eanet dieđut
Loga ofelaččaid beaivegirjjiid ja prošeavtta duogáža birra dás: www.samiskeveivisere.no. Váldde oktavuođa ofelaččaiguin e-poasttas samiskeveivisere@samiskhs.no go áiggut diŋgot ofelačča galledit iežat skuvlla.

Riikkaidgaskasaš álgoálbmotfestivála Riddu Riđđu lágiduvvo Gáivuonas suoidnemánu 10. – 15. b. www.riddu.com

Váldde oktavuođa
Ofelaš-prošeavtta jođiheaddjiin Marit Broch Johanseniin, Sámi allaskuvllas
Tel: +47 7848 7728
Mob: +47 9700 7625
e-poasta: marit-broch.johansen@samiskhs.no