Sámi ofelaččat – oktasaš davviriikkalaš prošeakta?

Bargo- ja searvadahttindepartemeanta juolluda 150.000 ruvnno ovdaprošektii mas Sámi allaskuvla galgá árvvoštallat sáhttá go sámi ofelaččaid prošeavtta maiddái viiddidit Ruŧŧii ja Supmii.

- Dán ášši birra áigut ságastallat dán čavčča min davviriikkalaš departemeantabargoustibiiguin, dadjá stáhtačálli Berit Oskal Eira.

Ovdaprošeavttas áigu Sámi allaskuvla ovttas Infonuorain Nordlándda fylkkagielddas, Sámi diehtojuohkinguovddážiin Ruoŧas ja Sámi oahpahusguovddážiin Suomas plánet oktasaš informašuvdnaáŋgiruššama sámiid birra ofelaš prošeavtta ja sullasaš informašuvdnaprošeavttaid vuođul mat gávdnojit Ruoŧas ja Suomas.

Stáhtakonsulta árvvoštallamisttis oaivvilda ahte prošeakta lea hui buorre, ja deattuhuvvo ahte Ruŧŧii ja Supmii livčči ávkkálaš searvat ortnegii.

Duogášdieđut:
Departemeanta álggahii sámi ofelaččaid prošeavtta 2004:s. Jahkásaččat leat golbma nuora ožžon oahpu Sámi Allaskuvllas, ja dasto leat mátkkoštan skuvllaide muitalit sámi kultuvrra, historjjá ja eallinvuogi birra. Dáinna lágiin sii leat maid beassan hupmat seammaáhkasaččaiguin dan birra mo lea leahket nuorran ja sápmelažžan.