Árvalus Sámedikki válgaortnega rievdadusaid birra

Ráđđehus árvala rievdadusaid sámelága njuolggadusaide Sámedikki válgaortnega birra. Ulbmil láhkarievdadusárvalusaiguin lea váikkuhit lassi oassálastimii sámediggeválgga oktavuođas ja sihkkarastit stuorát legitimitehta ja árvvu Sámediggái.

Rievdadusat maid mii árvalit dagahit ahte áirrasjuohkin Sámedikkis oktiivástida buorebut addojuvvon jienaiguin, ja dasa lassin oažžut mii mearkkašahtti johtilat válgaloahppaheami, lohká bargo- ja searvadahttinministár Bjarne Håkon Hanssen. –Sámedikki iežas válgaortnega revišuvdna lea ášši mas lea lunddolaš ja ulbmillaš ahte Sámedikkis lea fuopmášahtti váikkuheapmi. Mii leat dan dihtii bidjan mearrideaddji deattu Sámedikki oidnui,  joatká stáhtaráđđi.

Rievdadusárvalusat sisttisdollet earret eará válgabiirejuohkima ja áirrasjuogadeami. Válgabiiriid lohku Sámediggeválgga oktavuođas árvaluvvo geahpeduvvot 7 rádjai, 13 rájis odne. Revišuvdna dagaha ahte dárbu ortnegii mas leat njeallje dássenáirasa gahččá eret, ja ortnet árvaluvvo dan dihtii jávkaduvvot. Sámedikkis gártet de dainna lágiin fas 39 áirasa. Dasto árvaluvvo rievdadit namahusa “Sámi jienastuslohku” “Sámedikki jienastuslohkun”.

Rievdadusárvalusat árvaluvvojit čađahuvvot nu ahte dat doaibmagohtet 2009 Sámediggeválgga oktavuođas.

Árvalusat láhkarievdadusaide leat huksejuvvon ovtta áššedovdelávdegotti ráhkadan raportta ala. Sámediggi lei nammadan áššedovdelávdegotti  ovttasbargguin departemeanttain. Sámediggi lea konsulterejuvvon ráđđehusa láhkaárvalus barggus ja galgá konsulterejuvvot čuovvovaš njuolggadusbarggus.