Ráđđehus nanne sámi giela ja kultuvrra

Juolludeapmi sámi ulbmiliidda jahkái 2010 lea buohkanassii 798 milj. ruvnnu, mii čájeha 38 milj. ruvdnosaš lassáneami. Sámediggi oažžu jahkásaččat ruđaid máŋgga departemeanttas ja beassá jagi 2010 hálddašit 351 milj. ruvnnu, mii  mii lea 17 milj. ruvnnu eambbo go diibmá.

Sámegielat leat okta suorgi deháleamos surggiin. Ráđđehus árvala lasihit juolludeami Sámegielaid doaibmaplána čuovvoleapmái Bargo- ja searvadahttindepartemeantta (BSDa) bušeahtas lasi 5 milj. ruvnnuin jahkái 2010. AID lea dáinna lágiin stuorrudan juolludeami Sámegielaid doaibmaplánii buohkanassii 13 milj. ruvnnuin maŋimuš guovtte jagis.  

Olles 5 milj. ruvdnosaš sumis mii lea sámegielaid doaibmaplána čuovvoleapmái, ráđđehus áigu várret 1 milj. ruvnnu Sámi allaskuvlla Sámi lohkanguovddážii. Ruđat várrejuvvojit guovddážii maiddái Máhttodepartemeantta bušeahtas. Sámediggái juolluduvvojit 3,5 milj. ruvnnu jahkái 2010.

Jagi 2010 bušeahtas árvaluvvo álggahit ortnega mas lonejeaddjit guđet čađahit sámi oahpaheaddjioahpu dahje háhket alcceseaset sámegiela máhtu oahpaheaddjioahpu oassin, galget oažžut sihkkojuvvot oasi oahpahusvealggisteaset.  – Dát lea hui dehálaš doaibmabidju mii galgá lasihit daid oahpaheaddjiid ja ovdaskuvlaoahpaheaddjiid logu geain lea sámegiela máhttu, mii viidát váilu odne, nu cealká bargo- ja searvadahttin­ministtar Bjarne Håkon Hanssen.

Ráđđehus áigu juolludit sullii 215 milj. ruvnnu Sámediggái AIDa jagi 2010 bušeahtas. Juolludeapmi siskkilda ee. 4 milj. ruvnnu dainnago Loabága suohkan searvvai sáme­gielaid hálddašanguvlui dán čavčča. Dáinna lágiin ráđđehus lea lasihan guovttegielalaš­vuođa doarjaga suohkaniidda ja fylkkasuohkaniidda oktiibuot 14 milj. ruvnnuin jagi 2006 rájis.

Juolludeapmi sámi kulturulbmiliidda lasihuvvo sullii 10 milj. ruvnnuin jagi 2010. Dát supmi siskkilda 3,36 milj. ruvdnosaš lasáhusa Sámediggái, 3,3 milj. ruvnnu Sámi arkiivii, 2,1 milj. ruvnnu Ája Sámi Guovddáža huksenprošektii ja vel lasi 0,5 milj. ruvnnu Riikkaidgaskasaš Sámi Filbmaguovddážii  (Internasjonalt Samisk Filmsenter).

Birasgáhttendepartemeantta bušeahtas juolluduvvojit 1 milj. ruvnnu Ceavzzageađggi kulturmuitoguovllu dikšumii ja lágideapmái, mii lea Unjárggas Finnmárkku.

• Juolludeamit sámi áigumušaide 2010 stáhtabušeahtta (pdf) - 2010 stáhtabušeahta mielddus