Viiddida sámegielaid hálddašanguovllu

Ráđđehus árvala Ođastuvvon nationálabušeahtas 2009 lasihit juolludeami Sámediggái vai Loabága suohkan sáhttá searvat sámegielaid hálddašanguvlui. Seammás árvaluvvo ahte Njávdáma dákteriggeosiid ođđasis hávdádeapmái lasihuvvo 1,5 miljovnna ruvnnu.

Loabága suohkan ozai jagi 2008 iežas beassat lahttun sámegiela hálddašanguvlui. Ráđđehus árvala jagi 2009 ođastuvvon nationálabušeahas lassin juolludit Sámediggái miljovnna ruvnnu dainna ulbmiliin ahte Loabága suohkan galgá searvat sámegiela hálddašanguovllu lahttun golggotmánu 1. beaivvi rájis.

– Vai sámegiella sáhttá leat ealli giella, de lea dárbu ahte gillii láhččojuvvojit dilálašvuođat ja ahte giella oidno ja gullo almmolaš oktavuođain. Danne lea sámegiela boahtteáigái seailluheaddji barggus deháleamos oassi dat, ahte giela hálddašanguovlu viiddiduvvo, dadjá bargo- ja searvadahttinministtar Dag Terje Andersen.

– Mun lean rámis dan geažil go Loabága suohkan dál sáhttá šaddat sámegielaid hálddašanguovllu ovccát lahttun. Ovdalis ruksesruoná ráđđehus lea lahttun dahkan Divttasvuona suohkana (2006) ja Snoasa suohkana (2008). Dáinna árvalusain ráđđehus čuovvola Soria Moria julggaštusa ja Stuorradikki dieđáhusa nr 28 (2007-2008) Sámepolitihkka, mas áigumuš lea nannet sámegielaid barggu, dadjá stáhtaráđđi. 

– Jagi 1915 Oslo universitehta anatomalaš instituhtta čađahii roggamiid nuortalaš gili Njávdáma ortodoksalaš hávdebáikkis, mas válde dákteriggeosiid. Ráđđehus háliida čađahit dárbbašlaš doaibmabijuid sihkkarastin dihtii ahte Njávdáma dákteriggeoasit gutnálaččat fas hávdáduvvojit. Mii leat danne ođastuvvon nationálabušeahtas árvalan dán ulbmilii stuorrudit juolludeami 1,5 mijovnna ruvnnuin 3 miljovnna ruvdnui jagi 2009, dadjá bargo- ja searvadahttinministtar Dag Terje Andersen.