Dearvvahansárdni oahpásmahtidettiin áigodaga 2008-2009 ođđa sámi ofelaččaid

Márkomeannu suoidnemánu 25. b. 2008 , stáhtačálli Raimo Valle.

 

Dearvva!

Munnje lea stuorra illun dáppe Márkomeanus beassat oahpásmahttit didjiide dán jagi ođđa ofelaččaid.

Ođđa ofelaččat leat 19 jahkásaš Risten Márja Inga, Suorttas eret, 20 jahkásaš Ina-Ristin Danielsen Gundersen, Hell:is eret ja 20 jahkásaš Ul-Juhan Partapuoli, Deanus ertet.

Ođđa ofelaččat leat 5. ofelašjoavku. Ofelašprošeakta álggahuvvui 2004. Ulbmilin lea eanedit máhtu sámi dilálašvuođaid birra Norggas. Mii dalle lea buoret go dat ahte nuorat besset humadit nuoraiguin ja juogadit vásáhusaid das mo dat lea eallit nuorra sápmelažžan otná servodagas?

Ollugat mis deaivvadit beaivválaččat eará kulturvrraid olbmuiguin, geain leat eará árvvut, eará ipmárdusat ja eará vásáhusat go mis alddámet. Jus mii galgat juksat dakkár servodaga mii lea vuođđuduvvon gierdevašvuhtii ja árvvusatnimii, de mis fertejit leat dieđut guhtet guoibmáme birra, ja iešguđet kultuvrraid iešlágiid birra. Dán oktavuođas lea sámi ofelaččaid doaibma deahálaš. Sámi ofelažžan dii beassabehtet govvidit sámenuoraid, sámi kultuvrra ja sámi servodaga positiivalažžan. Ráđđehusas lea stuorra jáhkku dasa ahte gulahallan ja máhttu mearkkašit ollu nuoraid miellaguottuide.

Dán mii leat oaidnán dáppá Márkosámi guovllus, gos árjjalaččat bargojuvvo dan ala ahte ovddidit ja čalmmustahttit sámi giela ja kultuvrra. Márkomeannu lea dán dáfus ođas ja ealli oassin das. Danne lean hui ilus go beasan oahpásmahttit ođđa ofelaččaid aiddo dán festiválas ja dáppe Gállogietti olgomuseas.

Gallogieddi lea geavahuvvon oktilaččat 200 jagi. Dán dálu seinniin lea sámi historjá, dás deaivvadit vássánáiggi jienat ođđaáiggi sámi jienaiguin. Vássánáiggi deaivvadeapmi dálááiggiin nanne sámi gullevašvuođa, dan maid mii háliidit juogadit min birrasiin – sihke festivála bokte ja sámi ofelaččaid bokte.

Ofelaččain ja sin sáttasánis lea hui positiiva beaggin dain skuvllain maid ofelaččat lea galledan. Dan čájeha prošeavtta jagi 2007 árvvoštallan. Prošeavtta buorit vásáhusat leat dagahan ahte Sámi ofelččat leat šaddan stáhtabušeahta bistevaš doaibmabidjun dán jagi rájes.

Háliidan loahpas vel giitit buot daid ovddeš ofelaččaid sin erenoamáš buori barggu ovddas buoridemiin Norgga nuoraid máhtu sámi dilálašvuođaid birra. Sávan ahte din mielas, geat dál heaitibehtet ofelažžan, vásihuvvo positiivan dat bargu maid dii lehpet čađahan dán maŋimus jagis ja ahte dii lehpet ožžon ávkkálaš vásáhusa ja máhtu boahtte áigái. Seammás sávan didjiide lihku, geat dál joatkibehtet dán barggu!