Gollegiella – Davviriikkalaš sámegiela bálkkašupmi juhkkojuvvo njealját gearddi čakčat 2010

Davviriikkalaš sámegiela bálkkašupmi juhkkojuvvo njealját gearddi čakčat 2010. Buohkat bovdejuvvojit árvalit evttohasaid jagi 2010 giellabálkkašupmái. 

Giellabálkkašupmi sáhttá juhkkojuvvot ovttaskas olbmuide, joavkkuide, organisašuvnnaide dahje ásahusaide Ruoŧas, Noreggas, Suomas ja Ruoššas geat leat mávssolaččat áŋgiruššan sámegiela ovddidemiin. Giellabálkkašupmi galgá váikkuhit sámegiela ovddideapmái, ovdánahttimii ja seailluheapmái.

Čálalaš evttohus eanemusat 1-2 siidosaš ákkastallamiin sáddejuvvo árvvoštallanlávdegotti čállái: 

Brita Stina Sjaggo
Sámediggi 
Poastaboksa 90
SE-981 22 Giron/Kiruna
Ruoŧŧa/Sverige
Telefuvdna: +46(0)70-33 99 575
Telefáksa: +46(0)980-780 31
e-poasta: brita@sametinget.se

Árvalus galgá leat joavdan árvvoštallanlávdegoddái ovdal čakčamánu 1. b. 2010. 

”Gollegiela” árvvoštallanlávdegoddi galgá árvvoštallat árvaluvvon evttohasaid ja ákkastit iežas vuoitiárvalusa. Lávdegottis leat čuovvovaš lahtut: 

• Rose-Marie Huuva, árvvoštallanlávdegotti jođiheaddji (telefuvdna: + 46 70 392 10 39)
• Hanna Outakoski, Ruoŧŧa
• Nora Brandsfjeld, Norga
• Erkki Lumisalmi, Suopma
• Nina Afanasjeva, Ruošša

Giellabálkkašupmi juhkkojuvvo Stockholmmas skábmamánus 2010 dan čoahkkimis masa servet ministarat geain lea ovddasvástádus sámi áššiin Suomas, Ruoŧas ja Norggas, ja daid riikkaid sámediggepresideanttat.

Eambbo dieđuid gávnnat dás:

• Gollegiela njuolggadusat
• Giellabálkkašumi láiddanjuolggadusat
• Sámediggi.se
• Sámediggi.no