Movt ođasmahttit kulturealáhusaid?

Movt ovdánahttit ja ođasmahttit kulturealáhusaid? Dat lei fáddán go ođasmahttinministtar Rigmor Aasrud ja kulturministtar Anniken Huitfeldt gaskavahku bovdiiba ráđđádallančoahkkimii Romssas.

Birrá-beavddi ságastallama oasseváldit earret stáhtaráđi guoktá, ledje Davvi-Norgga kultuvrraid ja ealáhusaid ovddasteaddjit.

-Logut čájehit ahte ollu bargosajit leat čadnojuvvon kultuvrii ja ahte lea stuorra ahtanuššanvejolašvuohta jus čađahit rievttes doaibmabijuid, dadjá Aasrud.
Badjel 6000 olbmo Davvi-Norggas vižžet váldodietnasa kulturealáhusain. Dán lohkui eai leat almmolaš suorggi bargit reikenastojuvvon. Jus dán ealáhusa veardida guolleealáhusain gos leat 4000 bargi,  ja 1000 geat gullet guollabiebmanealáhussii. De eahpitkeahttá kulturealáhusain dat lea stuorimus ahtanuššanvejolašvuohta.

Ráđđádallamis eai dušše ovddidan jurdagiid guokte stáhtaráđiide. Okta kultursuorggi ovddasteddjiin illosii go gulai ealáhusovddasteddjiid čielggademiid ja oaiviliid. Son váillahii dávjjibut sullásaš čoahkkimiid vai nu buoridivččii gulahallama guovtti máilmmi gaskkas ja main livččii ollu maid sáhtaše goabbat guoimmiska oahppat ja ávkkit atnit.