Ođasmahttinministtar digaštalai digitála vuosttašválljema stáhta njunnošiiguin

Stáhta ferte njulget formálalaš eastagiid mat leat njuolggadusain ja šaddat čeahpibun bálddalastimiin almmolaš surggiid gaskkas jus galggaš lihkostuvvat áigumušain oažžut geavaheddjiid válljet digitála čovdosiid. Berrešii goalustit oktasaš IKT-čovdosiid almmolaš surggiid gaskkas ja ossodagat geatnegahttojit dan geavahit. Dieđuid ođđasit atnu lea dehálaš vai geavaheaddjit eai šatta fuolahit dieđuid ossodagaid gaskkas.

Dát leat dušše soames dain dieđuin maid ođasmahttinministtar oaččui go son miessemánu 5.beaivvi deaivvadii Difi, Brønnøysund-logahaga, Loatnakássa, Dearvvašvuođadirektoráhta, NAV, Statistalaš guovddášdoaimmahaga ja Vearrodirektoráhta njunnošjođiheddjiiguin SKATE nammasaš IT-forumas. Fáddán čoahkkimis lei Digitála vuosttašválljen.
 
Stáhtaráđđi hástalii ossodatjođiheddjiid das movt oažžut eanet ja buoret digitála bálvalusaid ássiid ja ealáhusaid várás. Makkár eastagat gávdnojit ja makkár doaibmabijuid berret álggahit vai lihkostuvvat ovttastahttimis ja digitaliseremis almmolaš bálvalusaid?

- Mii leat atnán ollu ruđaid ođasmahttimii ja siskkáldas struktuvrii, ja dál berret oaidnit das ávkki.  Ossodagat leat joavdan guhkas ovttastahttima ja ovttasbarggu ektui, muhto ain leat eastagat das movt oktasaš čovdosiid hálddašit ja ruhtadit. Mun ožžon ollu ávkkálaš árvalusaid ossodatjođiheddjiin ja daid lean merkon muitui, lohká ođasmahttinministtar Rigmor Aasrud.

Govvateaksta: Vearrodirektevra Svein Kristensen (gurutbealde), dearvvašvuođadirektevra Bjørn-Inge Larsen, ođasmahttiministtar Rigmor Aasrud, Difi-direktevra Hans Christian Holte, NAV-direktevra Tor Saglie ja Brønnøysund-logahaga direktevra Erik Fossum digaštalle digitála stáhta vuosttašválljema ja oktasaš hástalusaid. Govvideaddji: Kristin Braadvig.