Sámeministtar duhtavaš Finnmárkku mátkkiin

Golmma dilihis beaivvis oaččui sámeministtar Rigmor Aasrud vuđolaš čilgehusa min davimus fylkka birra. – Dát lei hirbmat miellagiddevaš ja lean oahppan olu.  Lean oaidnán olu ja beassan háleštit dehálaš olbmuiguin geat leat hui bures čilgen dán guovllu dilálašvuođaid ja hástalusaid, dadjá Aasrud.

Stáhtaráđđi galledii Bissojoga, Kárášjoga, Guovdageainnu ja Álttá dán golmma beaivásaš mátkkis. Prográmma sisdoallu lei ee. čoahkkimat ja galledit kvena instituhta, Sámedikki, Sámi allaskuvlla, Sorrisniva jiekŋahotealla, Álttá gieldda ja čoahkkimat buot sámi guovllu gielddaiguin. 

- Mii leat juo buorre muddui ovdánahttán sámi ásahusaid, ja doaimmat lihkostuvvet bures sihke Sámedikkis, gustojeaddji gielddain ja muđui sápmelaččaid bealis Finnmárkkus.  Muhto almmatge jáhkán ahte mii fertet rahčat ja juohkit ain eanet dieđuid vuođđo áššiid birra mat gusket ee. vuoigatvuođaide, luondduresurssaide ja eará áššiide mat sáhttet dagahit dárbbašmeahttun boasttuáddejumiid, lohká Rigmor Aasrud. 

Govat mátkkis:

Stáhtaráđđi Rigmor Aasrud álggahii mátki Finnmárkkus kvena Instituhta galledemiin.  Doppe lei diehtojuohkin oahpahushoavdda Terje Aronsen, (olgešb.), Solveig Samuelsen ja Oddbjørn Samuelsen bokte. Govven: FAD

Porsáŋggu kulturskuvlamánát lávlo sámegilli stáhtaráđđái ja su bargovehkii Kvena Instituhtas Bissojogas.  Govven:FAD

Sámedikkis lei stáhtaráđis čoahkkin Sámediggeráđiin.  Gurot rávddas: Várrepresideanta Laila Susanne Vars, Sámediggeráđi láhttu Marianne Balto ja Sámediggepresideanta Egil Olli.
Govven:FAD

Galledeapmi Kárášjogas loahpahuvvui mállásiin Stuorragoađis.  Gurot ravddas: Kárášjoga sátnejođiheaddji Kjell Sæther, stáhtaráđđi Rigmor Aasrud, Sámediggepresideanta Egil Olli ja várrepresideanta Laila Susanne Vars.  Govven:FAD

Sámi allaskuvlla rektor Steinar Pedersen (olgešb.) ja Riikkaidgaskasaš boazodoallofága- ja gaskkustanguovddáža stivrajođiheaddji Johan Mathis Turi vuostái válddiiga Rigmor Aasrud Sámi allaskuvllas.
Govven: FAD

Sorrisniva Igloo hotealla Álttás geasuhii stáhtaráđi Rigmor Aasrud ja departemeantaráđi Karin Moe Røisland.  Govven:FAD