Goallos sámegillii MuID fierpmádahkii

Ráđđehus lea dál láhčen vejolašvuođa goallostit almmolaš bálvalusaid fierpmádahkii eanemus geavahuvvon sámegielain, davvisámegielain.

-Dál lagabui 2,5 miljovnna olbmo goallostuvvojit MuID fierpmádahkii. Vai sámegiella galgá leat ealli giellan de dat ferte leat oassin maiddái digitála árgabeaivvis. Hálddašan ja DGT direktoráhtta (Difi) lea dál láhčen vejolašvuođa goallostuvvot fierpmádahkii davvisámegillii, dadjá ođasmahttin-, hálddahus- ja girkoministtar Rigmor Aasrud.

Ráđđehusa mihttomearrin lea ahte buot almmolaš DGT ovdáneapmi galgá čađahuvvot oppamáilmmálaš hábmema prinsihpaid mielde. Go lea sáhka sámegielas de dát e.e. mearkkaša ahte almmolaš dieđut maiddái galget leat gávdnamis sámegillii.

Davvisámegiela giellaválljen lea ID-uskkádaga maŋimus gáhppálat, oktasaščoavddus man bakte lea sihkkaris goallosteapmi almmolaš bálvalususkkádahkii. Dát gáhppálat váldo adnui eanas almmolaš bálvalusain 2011 vuosttaš jahkebeali mielde. Vaikko oaččut dieđuid sámegillii elektrovnnalaš goallosteami birra, de eai leat buot elektrovnnalaš bálvalusat jorgaluvvon davvisámegillii.