Ođđa borramušgávpeláhka

Ođđa borramušgávpeláhka buriid gávppašanvieruid birra galgá sihkkarastit borramušgávpesuorgái buori gávppašankultuvrra. Mihttomearri lea addit dábálaš geavaheddjiide stuorát válljenmuni, buriid fálaldagaid ja kvalitehta ja govttolaš hattiid. Ovttajienalaš borramušgávpeláhkalávdegoddi ovddidii otne ođđa láhkaárvalusa.

Ođđa láhka galgá muddet šiehtadallanrámmaid borramušgávpeovttastusaid ja gálvolágideddjiid gaskka. Ulbmil lágain lea sihkkarastit beaktilis šiehtadallamiid ja čielga gávpešiehtadusaid gaskal gálvolágideddjiid ja gávpeovttastusaid. Dat lea maid ovdamunnin dábálaš geavaheddjiide go sii ožžot de hálbbit gálvvuid, stuorát válljenmuni, nana kvalitehta ja dan ahte gálvvut leat olámuttus.  

Lávdegoddi árvala maid ásahit sierra Gávpebearráigeahčču mii galgá sihkkarastit lága čuovvoleami. Gávpebearráigeahčču galgá hálddahuslaččat Gilvobearráigeahču vuollásažžan.

Lávdegoddi oaivvilda ahte borramušgávpesuorggis lea dakkár gávppašankultuvra mii gáibida muddema.

Lávdegoddi čujuha ahte namuhuvvon váttisvuođaid buori muddui lea vejolaš čoavdit gustovaš láhkamearrádusaiguin, muhto konkludere ahte láhkamearrádusat leat oppalohkái eahpečielgasat ja eaige leat heivehuvvon borramušgávpemárkanii. Lávdegoddi oaivvilda ahte jos gálvolágideddjiide ja gávpeovttastusaide oaččuha áigái beaktilis šiehtadallamiid ja šiehtadusaid, de dat mielddisbuvttášii servodatekonomalaš buorredoaibmi čovdosiid, gos badjebáza boađášii ávkin dábálaš geavaheddjiide borramušgávpeovttastusaid gilvaleami bokte.

- Raporttas leat mii vuđolaččat guorahallan gávpeovttastusaid šiehtadallangaskavuođaid ja movt buorit gávppašanvierut leat vuhtiiváldojuvvon gustovaš láhkamearrádusain. Dál leat guokte almmolaš lávdegotti ávžžuhan ásahit čielgasat láhkamearrádusaid borramušgávpesuorggi šiehtadallamiidda. Dál lea dehálaš ahte mii čuovvolat ávžžuhusaid konkrehta doaimmaiguin, cealká eanandoallo- ja biebmoministtar Trygve Slagsvold Vedum.

- Mun beroštan das ahte norgga geavaheaddjit ožžot stuorit válljenmuni ja gálvovalljodaga gávppiin. Lean ilus go ođđa láhka buori gávppašanvieruid birra boahtá ávkin geavaheddjiide, sihke hattiid, válljenmuni ja kvalitehta dáfus ja ahte gálvvut leat olámuttus, dadjá geavaheaddjiministtar Inga Marte Thorkildsen.

- Lávdegoddi lea vuđolaččat guorahallan movt šiehtadallamat čađahuvvojit árvoviđjjis ja loahppaboađus lea ahte lea dárbu muddet gávpegaskavuođaid borramuš suorggis.  Lávdegotti guorahallamis lea alla fágalaš dássi, ja lea dehálaš oassi ráđđehusa viidáset barggus sihkkarastimis guoddevaš árvoviđjji borramuššii, lohká ođasmahttin-, hálddahus- ja girkoministtar Rigmor Aasrud (Bb).

- Lean maid duhtavaš go lávdegoddi lea ráddjen iežas doaimma gilvolága ektui, ja deattuhan ahte lávdegotti árvalus ii galgga negatiivvalaččat váikkuhit borramušárvoviđjji gilvaleapmái, dadjala Aasrud.

Borramušgávpeovttastusaid lávdegoddi ovddidii iežas árvalusa “Mat, makt og avmakt – om styrkeforholdene i verdikjeden for mat” (NOU 2011:4) cuoŋománu 13.b.2011. Eanetlohku ávžžuhii nannet láhkamearrádusaid mat buorebut muddejit gaskavuođaid maid sii oaivvildit  eahpegovttolaš gávpeláhttemin borramušgálvosuorggis.

Ráđđehus vuođđudii borramušgávpeláhkalávdegotti golggotmánus 2012 mii lea oassi Borramušgávpeovttastusaid lávdegotti barggu čuovvoleamis. Borramušgávpeláhkalávdegotti bargun lea leamaš guorahallat movt buriid gávppašanvieruid prinsihpaid ja dábálaš geavaheddjiid beroštumiid buoremusat sáhtašii suddjet láhkamearrádusaid bokte.

Mánáid-, dásseárvo- ja searvadahttindepartemeanta, Ođasmahttin-,  hálddahus- ja girkodepartemeanta ja Eanandoallo- ja biebmodepartemeanta áigot čuovvolit láhkalávdegotti árvalusa ovttasbarggu bokte.