Dál don beasat diehtit maid hálddahus bargá

Almmolaš elektrovnnalaš poastajournála (AEP) lea máilmmi vuosttamus almmolaš elektrovnnalaš poastajournála mii oppanassiige lea almmuhuvvon. 
– Otná rájes sáhttet buohkat diŋgot beassama geahčadit guovddášhálddahusa dokumeanttaid. Ovdal besse dušše journalisttat dan dahkat. AEP lea rabasvuohta ja demokratiija geavadis, cealká ođasmahttinministtar Rigmor Aasrud.

Buot dokumeanttat mat sáddejuvvojit departemeanttaide, direktoráhtaide ja stáhtalaš etáhtaide ja maid departemeanttat, direktoráhtat ja stáhtalaš etáhtat ieža sáddejit earáide, girjejuvvojit journálii. AEP.no čujuhusas lea vejolaš bláđet ja ohcat poastajournálain. Jus gávnnat juoidá mii beroštahttá, de sáhtát álkit dáhttut beassat dokumentii ja dan lohkat. 

- Rabasvuohta eaktuda beassama. AEPain sáhttet sihke čeahpit ja easkkaálgit álkit oažžut stáhtahálddahusas visogova ja oaidnit maid dat bargá. Mii leat máŋga jagi oaidnán man dehálaš poastajournálat leat pressii go dat galgá čađahit kritihkalaš journalistihka. Mun doaivvun AEP šaddá dakkár reaidun mii váikkuha demokratiijii ja ássiid searvamii, dadjá ođasmahttinministtar Aasrud.

Ovdal ge lea leamaš vejolaš beassat geahčadit almmolaš dokumeanttaid, muhto dalle fertii olmmoš diehtit dihto ášši gávdnoma birra. Dušše journalisttain lea leamaš oppalaš visogovva das mat dokumenttaid sáddejuvvojit ovdamearkka dihtii departemeanttaide ja departemeanttain.
- AEPain ožžot buohkat dan vejolašvuođa mii ovdal lei aivve journalisttain, ja dan lassin bidjet eanet doaimmahagat go ovdal poastajournálaideaset olbmuid olámuddui, cealká stáhtaráđđi. 

Go dat almmuhuvvo miessemánu 18. beaivvi 2010, de leat buot departemeanttat, Stáhtaministara kontuvra ja vel máŋga stáhtalaš doaimmahaga mielde AEPas. Arvat doaimmahagat bohtet lassin dađistaga go dat leat gárvásat searvat. Hálddahusa ja IKTa direktoráhtas lea ovddasvástádus hálddašit ja jođihit bálvalus. Ođasmahttin-, hálddahus- ja girkodepartemeanttas lea leamaš ovddasvástádus ráhkadit AEPa. 

Loga eambbo ja váldde atnui AEPa dás www.oep.no