Fylkkamánni govviduvvo positiivalaččat suohkanguorahallamis

Fylkkamánni nanne sajádagastis  bagadallin suohkaniid ektui ja riektesihkarvuođa dáhkideaddjin, muhto suohkanat leat duhtameahttumat guhkes áššemeannudanáiggiin ja movt Fylkkamánni hálddaša plána- ja huksenáššiid.
Dát boahtá ovdan guorahallamis man Difi lea čađahan Ođasmahttin- hálddahus- ja girkodepartemeanta (FAD) ovddas.

Guorahallamis bivdojuvvojit riika ráđđeolbmát ja sátnejođiheaddjit árvvoštallat man bures Fylkkamánni bargá áššiiguin suohkaniid ektui. Mihtideames suohkaniid duhtavašvuođa ámmáha doaimmaiguin earuhuvvo 1-6 ceahkkálasain, ja iskkadeamis fylkkamánne gaskamearálaččat oažžu 4,4 čuoggá.

- Dát buorre boađus nanne Fylkkamánne dehálaš sajádaga go lea sáhka hábmemis ja čađaheames stáhtalaš politihka daid surggiin main riika beroštumit  galget deattuhuvvot seammásgo guovlulaš beroštumit maiddái vuhtiiváldojuvvojit, dadjá ođasmahttinministtar Rigmor Aasrud.

Gažadaniskkadeapmi lea čađahuvvon fylkkamánneámmáhiid doaibmi jođihanovdánahttinprográmma oktavuođas, ja Aasrud oaivvilda ahte bohtosat leat dehálačča dán oktavuođas, muhto maiddái juogadankultuvrra ovdánahttimis nu ahte guhtet guimmiideametguin oahppat.

- Go 82 proseanta sis geat leat vástidan, dadjet ahte gulahallan Fylkkamánniin čađahuvvo rabasvuođain ja luohttevašvuođain, de dat dagaha nana vuođu ovddasguvlui, deattuha Aasrud.

Unnimus duhtavaččat leat suohkanat áššemeannudanáiggiin (3,6 čuoggá) ja plána- ja huksenáššiid meannudemiin.

- Ahte suohkanat leat duhtameahttumat Fylkkamánni plána- ja huksenáššiid meannudemiin ii hirpmáhuhte. Dákkár áššiin šaddá Fylkkamánnii dávjá árvvoštallat riikkalaš beroštumiid báikkálaš beroštumiid  ektui, ja mii dagaha ahte sin mearrádus ii álot heive oktii suohkana mearrádusain, dadjá Aasrud. Son lohka muhtun fylkkaid sáhttit oanidit áššemeannudanáiggi.
- FAD áigu danin vuolggahit ságastallama ovddasvástideaddji fágadepartemeanttaiguin ja ámmáhiiguin, ja guorahallat ja buoridit ámmáhiid áššemeannudanáiggi, lohka Aasrud.

Aasrud iige hirpmahuvvo go soames fylkkain leat heajut bohtosat  go earáin.

- Lea lunddolaš ja maiddái riekta ahte ámmáhiin leat iešguđetlágan bohtosat. Ámmáhat galget doaibmat 18 iešguđetlágan fylkkain, gos suohkaniid lohku ja sturrodat, geografiija, ealáhusvuođđu ja olmmošlohku rievddada ja nu maiddái riidoáššiid nugomat gáddeavádat, eanansuodjaleapmi ja suodjaluvvon guovllut. Go dát lea daddjon, de stuora erohusat fylkkaid gaskkas main leat oalle sullásaš rámmaeavttut dáidá mearkkašit ahte sáhttet buorebut bargat. Mun lean mihá sihkar ahte ámmáhat barget iežaset hástalusaiguin seammás go ohppet dain ámmáhiin mat buorebut barget, dadjá stáhtaráđđi.

Dás gávnnat olles iskkadeami ja juohke áidna fylkkaid boađusraporttaid (girjedárogillii)