MuID-menestus gáibida 13 milliuvnna ruvdnosaš lasáhusa

Badjel beali riikka rávis álbmogis lea alccesis háhkan MuID, ja sihke geavaheddjiid lohku ja sisaloggenlohku lea ain stuorrumin.  - MuID lea šaddan hirbmat menestus, go geavaheapmi lea duppalaston maŋimuš jagi. Danin evttoha ráđđehus 13-milliuvdnasaš lássejuolludeami, dadjá  ođasmahttinministtar Rigmor Aasrud.

Eanet ja eanet ássit válljejit elektrovnnalaččat gulahallat almmolaš ásahusaiguin.

- MuID lea menestus danin go lea nu álki dihtorčovdosa geavahit. Elektrovnnalaš ID lea dárbbašlaš, nu ahte riikka ássiide álkimus vuohki váldit oktavuođa almmolaš ásahusaiguin šaddá digitála vuogádaga bokte. Go sáhttá buot dahkat šearpmas, de seastá almmolašvuohta ruđaid, ássiide šaddá álkit, ja manná jođánabbot maid, dadjá ođasmahttinministtar.

Riegádan- ja persovdnanummiriin, iešválljejuvvon beassansániin ja lasi beassansániin mii doaibmá oktii ja mii sáddejuvvo geavaheaddjái sms  bokte, besset geavaheaddjit addit selvána, lonuhit fástadoaktára, addit NAV:ii dieđihankoartta, ohcat skuvlasaji ja lohkanloana, oaidnit iežaset penšundieđuid ja máŋgga eará almmolaš bálvalusaid.

Leat ain eanet ahte eanet almmolaš ásahusat mat geavahišgoahtit MuID. Evttohuvvon 13-milliuvnnasaš lassejuolludeapmi reviderejuvvon našunálabušeahtas lea dárbbašlaš jus galgat nagodit gieđahallat lasi geavaheami sihke ássiid ja almmolaš etáhtaid bealis mat háliidit váldit atnui MuID dihtorčovdosa. 2 150 000 Norgga ássiin geat leat badjel 15 jagi geavahit dál MuID.